السيارات الفخمه والاقتصاديه

السلام عليكم ورحمة الله وبركاته

احبتي المزاعيط اسعد الله مساءكم وصباحكم بكل خير

خلونا نتناقش (بعقل) وبدون مبالغه
وبنفس الوقت خلونا نتناقش بشكل مقنع وحضاري


بالنسبه للسفرات الى المغرب بشكل عام

هل تؤيد استئجار سياره فاخره فخمه
مثال: (مرسيدس) (رنج روفر) (بورش) وهذي الفئات

والا تكون في المعتدل المتوسط
مثال: (جيب شيروكي) (تويوتا) (طوارق) وهذه الفئات

والا سياره اقتصاديه بسيطه
مثال: (فيات) (بيجو) (فورد) وهذه الفئات

طبعا نقاشنا يكون بالاسباب الايجابيه والسلبيه

انا عن نفسي اقترح الفئه الفخمه لبعض الاحيان
يعني عن الخاطر تجرب شوي عن خاطرك مايخالف
انك تجرب السياره الفخمه في البلد شوي

اما الاغلب انا من وجهة نظري من بعدها المفروض تخليك بالمتوسط
الفئه المعتدله المتوسطه لاسباب مقنعه ايضا

اول شي تبعد الشبهات عنك وتندمج مع كافة الشعب
حالك حال باقي سيارات المدينه ماتكون مميز وملف الانظار (للدرك)

ثانيا السياره الفخمه وش بتسوي فيها ؟
سهراتك جلساتك كل حاجه بتكون بمحلات مب بالسياره
لو بنقول بتتمشى بشوارع معينه وتلفت الانظار لصالحك
وماراح تتمشى مع خويتك بالسياره عشان تتفشخر مثلا معها

يعني بالعربي المختصر
سيارتك لاتكون اقل من مستوى سيارتك في بلادك
وذلك من باب الراحه في السواقه يعني والاستعمال

وبنفس الوقت مايحتاج تكون بنفس او اكبر من مستوى سيارتك في بلدك
لانك ماراح تستفيد اي حاجه ابدا وهالشي عن تجربه

انا جربت الفئه المتوسطه والفئه الفخمه
والله اني مالقيت اي فرق في اي حاجه
غير ان الفخمه جابت لي المشاكل اساسا بسبب تميزها
ومن بعييييد الدرك تلقاه مترصدك وناطرك توصل للنقطه عنده

باذن الله ناوي هذي السفره اخذ شي متوسط
عشان نندمج مع كافة الشعب بالشوارع ونبعد الشبهات
وبنفس الوقت تقتصد في صرفك اليومي
وتقدر توفر فرق المبلغ على اشياء اجمل اخرى

وسامحوني على الاطاله
وحبيت اشارككم الراي والنقاش
وصل الله وسلم على محمد عليه الصلاة والسلام


تحياتي للجميع

هلا الفاهد ..
ما قصرت انت كتبت كل الآراء بـ نفسك
و راح اشاركك رأي ..

السيارات اللي استأجرتها كلها صغيره الا مره استاجرت سياره فخمه لمدة يومين و السبب بسيط انه كنت مع عائلـه تعز عليا جداً و قال واحد منهم أن نفسه يركب وحده من السيارات الفارهه

نرجع للموضوع :
اولاً :
في نظري السياره وسيلة و ليست غايه
انا احتاجها فقط لـ التنقلات لجل كذا افضل السياره اللي ما تلفت نظر و تلاقي لها موقف في أي مكان
ثانياً :
المبلغ اللي راح اصرفه في اجار السياره الفارهه
استفيد منه في امور ثانيه .. سهر ـ هدايا ـ سكن ـ تمشيات ـ او حتى بزيادة مدة الرحله
و احسب الفرق بين السياره العاديه و السياره الفارهه و اضربها بـ المده راح تحس انها تعيشك اقل شي 5 ايام زياده

ثالثاً :
مثل ما ذكرت ما راح تكون ملفته بس لدرك
كمان راح تكون ملفته لناس اللي تحتك فيهم كان الاحتكاك
بشكل يومي او بـ اوقات الفله .. و اغلب اللي راح يحتكو فيك
اوقات الفلـه من الفئه اللي يجب البعد عنها


اتمنى وصلت فكرتي


شكراً لك

يعطيك العافيه الفاهد على هالموضوع
بالنسبه لي جربت جميع الأنواع بالنسبه للسيارات الفارهه والسبورت مثل البورش والموستنغ والرنج
والبانيميرا
وصراحه وجدت انها بالمغرب تبهذل كل شوي موقفينك الشرطه والدرك لو انك تمشي عادي
بدون أي مخالفه
والله ان السيارات الصغار ابرك واحسن وارخص وقليل يوقفونك ومحد صوبك
وبالنسبه للفت الأنظار اغلب اللي يطالعونك او يحاولون يكلمونك 99 بالميه منهم الهدف مادي
يعني على بورش والا اكسنت والا على رجولك الحال واحد
وانا شخصيا مع اني اعرف البلد وادل في كثير من المدن افضل السائق لانه يفكني من غثا الشرطه
والدرك ومريح راسي وخصوصا في مراكش ما احاتي ادور موقف ولا أي شي انزل بالمكان اللي ابي
على طول ولا بغيته تلفون ودقيقه وهو عندك
تحياتي للجميع

بالنسبة لي اخذ اصغر سيارة المهم عندي انها توصلني لأي مكان ابغاه ،، منها توفير والشي الأهم أخذت صغيره ولا مرسيدس ماراح تفرق بالنسبة لي لانها ايام وبسلمها والصغيره تفي بالغرض ..

عن نفسي شخصياً لما نكون شخصين نأخذ اكسنت
و اكثر عن شخصين نأخذ هيونداي i30
و الرحلة الجاية منسق مع ابو سيرين آخذ من عندة ديستر و قالي ابشر
بو سيرين اليوم كلمتة و بكل أمانة انسان يدخل القلب و ينحب
تحس نفسك من زمان تعرفة ،،

بالمختصر اهم شي سيارة توفي بالغرض
و بتكلفة اقل ،،

بالنسبه لي انا اقل سياره اخذها طبعاً تكون نظيفه لانه حرام ادفع مبلغ وقدره على اسبوع او اسبوعين في النهايه هي لمدة محدده

موضوع جميل
بالنسبه للسياره وسيله وخصوصا ليست ملكيه
من وجهة نظري اشوف عدة نقاط
تكمله للموضوع وهو عين العقل
بالنسبه للناس اللي تسافر بين المدن انا انصح بسياره متوسطه
بالنسبه للمدينه الواحده انصح بسياره صغيره
اما في المناسبات او الحفلات لا يمنع من سياره فاخره لمدة المناسبه
انصح باستخدام السياره بسائق افضل
لان السياره تحرجك في كثير من المواقف وتلم الناس عليك
السياره ضريبه عليك
واصلن السفر ورحلتك بتكون بمدينه خلك مخدوم مو مثل بعض الشباب
كل يوم اشوفهم جالسين يفرون بالسياره بصراحه مالها معنى
وطول يومهم بها السياره والمسجل يرقع
الميزه هي الاختلاط وتجربة الاماكن الجديده
والمشي بصراحه ممتع بالمغرب
وبالتوفيق للجميع

حياك الله مشرفنا الغالي نورتنا ,,

بالضبط كلامك عين العقل ومثل ماقلت انا سابقا لامانع انك تدلع نفسك ولو لمرة بالرفاهيه عن الخاطر

وباقي وقتك خليك مندمج مع بقية الشعب ازين لك واسهل لك في امور كثيره
ومثل ما انت عارفه ,, اللي بيجيك بيجيك سواء كنت انت بسيارة فخمه والا طيارة والا على حصان ههههه

تحياتي لك اخوي

حياك اخوي الغالي ابوفالح واشكر مشاركتك الطيبه

كلامك جميل وفعلا انا اول سفرتين لي للمغرب كنت مع السائق
ولكن ياخوي السائق مايكون تحت تصرفك 24 ساعه ,, له وقت معين ويروح لأهله بعد

المشكلة انا ممكن في اي لحظة ابغي اطلع اتمشى صعب تدق عليه كل شوي حتى لو ياخذ حسابه
بعد احيانا تحتاج انك تتمشى لحالك شوي فيها راحة مختلفه شوي

تحياتي لك يالغالي

ياعيني عليك ,, هذا كلام الصح , اي والله ياخي السياره المهم توفي بالغرض توصلك مشاويرك وانتهى

تحياتي لك اخوي