رحلتي الثانية الى طنجة....تعال واستفيد واعرف المستخبي

mak90 · 2017-01-05T14:13:18+00:00

اهلين بالمزاعيط....حالياً اكتب لكم وانا في القطار متجه من طنجة الى كازا بعد رحلة كانت من اجمل الرحلات وهي الثالثة بالنسبة لي الى المغرب وتعلمت فيها الكثير....نجي للمهم والأهم...بداية طنجة هي مدينة في نظري صغيرة ولها جوها الخاص يعني تنفع للشخص الرايق واللي يميل نوعاً ما الى الهدوء ويحب جمال الطبيعة الممزوج برقي المدينة والحياة العصرية (عروسة الشمال) كما سميت....النقطة الاولى اللي لاحظتها بطنجة مدينة امنة جداً ولم يواجهني اية مشاكل طوال فترة اقامتي ولله الحمد التي اجتازت ال 18 يوماً علماً بأن الرحلة السابقة كانت 4 ايام ولم تكن موفقة وشددت الرحال لمراكش ولكن بعد اصرار وعزيمة عدت لطنجة لاكتشف اسرار تلك المدينة الساحرة....النقطة الثانية اذا تبغى ترتاح وتشتري دماغك اجر سيارة وروح انبسط من طنجة لتطوان وشفشاون واصيلة ولاتنسى الرميلات ومغارة هرقل وبفضل الله الأن اصبحت حافظ الطرقات ومن دون جي بي اس ولا شي طنجة سهلة وممتعة جداً في القيادة والحمد لله ماوقفني لا درك ولا شرطة اهم شي التزم بالسرعة واحترم قوانين القيادة هناك ولاتظهر لأحد نظرة خوف مهما كان وضعك!!! وعااادي في طنجة تقود السيارة ومعك اي شخص وافهم يافهيم ولاتقع فريسة سهلة لمن يصطاد في الماء العكر وتكلم بكل ثقة ولاتبين انك مو عارف النظام..ودائماً خلك حسن المظهر لبق التعامل وحاول تتكلم بأي لغة اجنبية لانها راح تخدمك كثييير وتفكك من الشحاتين والقلق تبعهم....والنقطة الاهم واللي يمكن تزعل البعض من اعضاء المنتدى بالأخص بعض الوكالات...صراحة الاسعار هنا خرافية والشقق ليست بالمستوى المطلوب غير انك لو بس طالبت بشيء بسيط من الخدمات وهو شي من ابسط حقوقك قد ينقلب الشخص امامك الى شخص اخر ويسبك ويقولك كلام مو حلو ناهيك انه ناصب عليك بالسعر ويطلبك اكرامية ولا داعي لذكر اسماء ولا اريد التطرق الى هذا الموضوع وكل هذا لوجه الله والمسامح كريم...يعني من الاخر ابتعد عن السمااااسرة هم وجع راس واسعارهم غاليه وشققهم معفنه واوسخ طبقة تعاملت معهم وانا هنا ماعمم ولكن غالبيتهم....جالسين يستغلون الاعضاء بحجة الامان لكن تعال اقولك وخذها مني اي عمارة بطنجة تسكن فيها امان وتبغى ترتاح وتشتري دماغك ابعد عن العماير اللي خلف الماكدونالدز (ايريس بلاج)وجع راس عساسين غير محترمين باستثناء واحد فيهم اسمه حسن هذا احسن شخص تعاملت معه...غير الطاقم المشرف على المبنى لا نظافة ولا شي وتطلبهم الشي يقولك دابا ويجيك بعد يوم... الشقق مو نظيفة وتحس بكئابة وعيون الناس عليك في الطالع والنازل يعني من الاخر ابتعد كل البعد لان العماير صارت مشبوهة وحاول تستأجر من الملاك وبتلاقي شقق نظيفة وراقية جداً والثمن لايتعدى 700 درهم مع الشغالة وشي ارقى من القرف اللي بلونا فيه اثاث مكسر وفرش موسخه ويتعاملون معك كأنهم مخفضين لك وهم شلة شماكرة ومعلين السعر عليك وكل واحد قاعد يترزق في ظهرك...يعني من الاخر تبغى رحلتك تزين ابتعد عنهم والامان بيد الله وكل مكان امان في طنجة واي عمارة تقدر تدخل اللي تبغى وبدون ماتدفع ولا درهم وانت واسلوبك....وفي مثل يقول ادهن السير يسير يعني لو طبيت في عساس نشبة مايمنع انك تزبطو ب 50 درهم ولايضحكون عليك المكاتب هناك ويقولون لك عوائل ومدري ايش لان كل العمائر هناك فيها عوائل ويقولون عوائل بالذات اذا شافوك خليجي ولكن مو من حق اي شخص انه يمنعك من استقبال ضيوفك والافضل لمن تدور اسأل العساسين وهم يعطونك ارقام الملاك او يكون المفتاح عند العساس وهو مكلف بالكراء...وايضاً حاب اتطرق لنقطة مهمة وتكلمنا فيها بأكثر من موضوع في بعض الاخوة والاخوات هنا في المنتدى يتكلموا ويقولوا ان وجود السائح الخليجي بدا يكثر بطنجة وبدت تخرب...احب اقولهم رحلتي هذي تعرفت فيها على مغاربة من جميع الطبقات وخالطت الشعب المغربي الحبيب....واكتشفت شي واتمنى ماحد يفهمني غلط ولا يزعل او ياخذ الموضوع بتعصب!!! اللي يقول ان السائح الخليجي يخرب الدنيا والمقاهي فيها مناظر مسيئة ارد عليه وبكل قوة واقوله لا ياحبيبي السائح الخليجي مسكين بالنسبة لبعض المغاربة والمناظر اللي شفتها من تحرش ومضايقات للبنات في كل مكان وبالتحديد منطقة الكورنيش والمولات وقسم بالله ماكنت احسب ان فيه ترقيم الا بالسعودية ولمن جلست 18 يوم وطلعت ومشيت!!!في كل شبر تلاقي ترقيم وتحرش ويرقمون الوحدة حتى لو معاها رجال وعادي عيني عينك قدام الناس يعني اللي يقول السائح الخليجي يجي يعمل ويسوي اقوله اسمحلي روح شوف انت ابناء جلدتك ايش بيعملو من غير ان الواحد يغازل البنت بكم كلمة ويركبها عيني عينك قدام الناس والعالم وحتى الشرطة ههههههه على الأقل السائح الخليجي يجي بأسلوب راقي ومايعمل مشاكل ولا يتحرش باسلوب همجي زي ماشفت يعني حاله في شانه واماكنه معروفه...وهذا ليس استنقاص من اخواننا المغاربة او اني احمل شي ضدهم بالعكس هم حبايبي وعندي اصحاب وصاحبات هناك كثير واتشرف بصحبتهم لكن الحق ينقال السائح الخليجي هناك مظلوم ومهضوم حقه وكل مصيبة حطوها براسه وظاهرة التنقيط في المراقص روح مارسيلو وشوف بعض المغاربة ايش يعملوا مو بس الخليجي اللي ينقط!!!.....و تطرقت للنقطة هذي لكي اوضح الأمور اللي تخفى على البعض واقوله اذا انت شاك في كلامي اطلع مع الناس وامشي وبتشوف وبالتحديد طنجة وفي نفس الوقت اعتراض ونفي لظاهرة التحرش ومافي انسان كامل كلنا خطائين والله يحب الخطائين التوابين والكمال لوجه الله......وايضاً لاتنسى تروح تاكل لحم مشوي على طريق الرباط في مواقف هناك ديال التاكسي مايحضرني اسمها حالياً ولكن شي رهييييب الذبائح معلقة قدامك ويقطعون لك ويشوون و تاكل احلى وجبة لحم وكبدة غير المقبلات والعلوم الزينة ولاتنسى تطلبهم اتاي بزبلو على قولة المغاربة....نجي للسهر... في طنجة السهر نوعاً ما ممل وكما سبق وقلنا تنفع للناس الرايقة انا ماعجبني غير مكان واحد واللي هو مارسيلو مكان راقي والناس اللي تجيه راقيه والمطربين اصواتهم حلوه واذا انت شخص تحب الغربي روح لبلاك جنب مارسيلو ويعتبر افضل السيئين وفي ايضاً كلوب كبير ماني متذكر اسمه اللي هو( لا دي روزا) او شي زي كذا المهم انه اكبر نايت كلوب في طنجة ودي جي وزي شغل مراكش طابقين وشي راقي...اما الموفنبيك اذا تبي تشوف الهمج وحقين الشام وربع الشيلات مع احترامي للجميع هههههه روح اضحك عليهم وانبسط والمصيبة الوجيه اللي بمقهى لؤلؤة الشمال واسطنبول بالتحديد تلاقيهم اول الليل هناك واخر الليل في الموفنبيك يومياً تقول طنجة مافيها غير هالمكانين انا رحت له مرتين ومجبور عشان الشخص اللي معي يبغى يضحك على المناظر اللي هناك غير الضحك على الدقون بالاسعار والخدمة السيئة والسماعات اللي مدري كيف واصوات المطربين اللي اتوقع لو غنيت انا صوتي احسن منهم....واحذر تروح تسهر بالمرقص اللي في كنزي شي سيء مررررة.....وباب الحارة اللي هو (الديوان) يعني لا بأس به لكن المكان مخنوق وصغير.... ايضاً الموال جميل ولكن لايوجد به مشروبات كحولية وايضاً رمسيس دي جي وقعدة رايقة....واحب انوه على نقطة يمكن البعض يجهلها وانا كنت واحد منهم ترا اذا دخلت وجلست على طاولة مو شرط انك تاخذ قرعة ((عصير)) كبيرة يعني خلك شاطر ولاينضحك عليك ادخل واختار الطاولة اللي تعجبك واجلس واطلب المشروبات اللي تبغى بالكاسة وسعر المشروبات من 70 وانت طالع يعني اشرب لين تطفش وحسابك ماراح يوصل 600 درهم بينما لو طلبت الطاولة مع القرعة يقولك اقل شي مثلاً 1800 درهم ويييييين يابوي!!!! الا لو انتم مجموعة وبينقسم المبلغ عليكم هنا يكون الوضع اوكي....واذا تبغى تزبط امورك وهذي النقطة للي فاهمني ابتعد عن ربع المقاهي من الأخر (بو زبال) على قولة المغاربة وخل شغلك بالنهار وبالمولات والمحلات يعني من الأخر انت واسلوبك ومظهرك......وهذه بعض من اسرار طنجة الساحرة اللي اتمنى انها تكون مفيده اعتذر على الاطالة ولكن كل الامور اللي وضحتها محبة في المنتدى واعضائه وابغى الكل يستفيد واعتذر عن اي خطاء بغير قصد....واي استفسار انا بالخدمة الا شي واحد اللي هو لا احد يجي يقولي وين سكنت ولا يبي رقم اللي اجر لي لأن هذا الطلب من الشخص نفسه صاحب العقار اللي صار صديق مقرب لي الأن حيث ان الشقة اللي كان مكريها لي ملك له ومخليها كذا لأسباب خاصة....بالتوفيق للجميع

عبدالمحسن

مزعوط نشيط

المشاركات: 67

تاريخ التسجيل: Mar 2013

الدولة: السعودية

2017-01-07, 02:07 PM

المشاركه #1

طيب وين الاحياء الجيدة اللى يدور الشقق فيها مادام خلف ماكدونالد شبهة

mak90

مزعوط قدير

المشاركات: 218

تاريخ التسجيل: Jan 2016

2017-01-07, 08:42 PM

المشاركه #2

اقتباس:

المشاركة الأصلية كتبت بواسطة عبدالمحسن

طيب وين الاحياء الجيدة اللى يدور الشقق فيها مادام خلف ماكدونالد شبهة

الكورنيش ومحمد السادس كامل عندك بكبره دور فيهم وبتلاقي واللي هي نفس المنطقة اللي فيها العماير اللي خلف ماك...اما العماير تبع ايريس بلاج انحاااش منها نصيحة لوجه الله...تحس انك داخل وكر ولا انظمة امان ولا شي في المصاعد واي شخص يقدر يتسلل للعمارة وغير الشحاتين اللي يتجمعون لك تحت.....في عماير حديثة وماحد يقدر يخش ابداً الا بالمفتاح اللي عندك للبوابة او انت تفتح له من فوق بالأنتر كوم وغير كذا المصعد مايتحرك ولا دور الا بالشريحة الذكية اللي معك يعني مو كل من هب ودب يطب عليك غير الباركنق اللي بريموت انت تدخل وتطلع وقت ماتبي ولا احد يكلمك مو زي الزفت هذيك عساس ناشب لك والناس كلها تبحلق فيك وانت داخل وخارج غير تجمع الشرطة اللي اصبح ملحوظ اليومين هذي امام عماير ايريس بلاج لأن بدت تطلع ريحتها واتمنى انكم ماتقعون فريسة سهلة ايها الاعضاء الكرام!!!

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: رحلتي الثانية الى طنجة....تعال واستفيد واعرف المستخبي
الموضوع	آخر مشاركة
مسافر على طنجة وعندك استفسار تعال هنا	2024-07-01 06:28 PM
تقرير رحلتي في باكو تعال شوف	2022-11-17 01:34 PM
رحلتي الثانية الي المغرب (الاولى كانت جنون)	2019-11-03 11:17 PM
11 اغسطس بكرة رحلتي للمغرب هيا تعال وشوف	2016-02-17 02:17 AM
رحلتي الثانية يوم الثلاثاء القادم فجرا 18 شعبان	2011-07-23 03:04 AM

الساعة الآن 08:15 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

رحلتي الثانية الى طنجة....تعال واستفيد واعرف المستخبي

روابط سريعه