سعر ايجار السيارات

انا اخر سفرة لي قبل كم شهر استاجرت رنج ايفوك 2017 ب 750 درهم في اليوم

وللاسف كانت غلطة ماراح اكررها

بسبب ان السيارة نوعا ما ملفته للنظر وخصوصا للدرك والشرطة ( مع انها ايفوك يعني بالنسبه لنا ماتعتبر فخمه مره)

وقفني الدرك يمكن 4 مرات والشرطة مرتين

كلها من غير سبب مقنع

وقفني الدرك على طريق مراكش اكادير بسبب السرعه وانا سرعتي كانت نظامية يقول الرادر مصورك قلت اتثبت لي جيب الصورة اوعطني شي مكتوب فيه السرعه ( اصلا كنت مثبت على السرعه النظاميه)

اخذ رخصتي واوارق السيارة وراح للسيارة يتناقش مع صاحبه بعدين رجع واعطاني اوراق السيارة وقال انت ضيفنا من السعودية وعلشانك ضيف راح اسامحك طبعا ما رديت عليه اوجادلته كنت ابي الموضوع ينتهي على خير قلتله شكرا لك مع ابتسامه صفرا للعلم ان سرعتي متاكد تماما 100% انها نظامية

كان ينتظر مني اعطيه اكراميه يوم شاف اني ماعطيته شي جلس تقريبا نص ساعه ماعطاني الرخصة طبعا جالس في السيارة في عز الشمس والظهر

بعيدن رجع واعطاني الرخصة ومشيت

الموقف الثاني الدرك في نفس الطريق وقفني يقولي في علامه قف ليش ماوقفت ؟ مع ان مافي اي شي مكتوب قف قالي الا كل الناس وقفت الا انت بعدين قلت وين الناس اللي توقف يلا وريني !! صرف الموضوع وقعد يسولف معي وواضح يبغى اعطيه اكراميه. يقولي اول مره تجي المغرب قلتله اي اول مره شاف اني غشيم وتركني

على كثر ماريحتني السيارة بمشاوريري الا انها غثتني كل شوي موقفني درك ولا شرطي

والله لو اني على غلط او مخالف لقوانين السير ماراح اكون زعلان ابد بس كذا يتبلونك علشان نوع سيارتك

عرفت بعدين ان الشرطة والدرك يعتبرون اللي يركبون سياراة فخمه صيد لهم ويحاولون يبتزونهم بهذه الطريقة ويطلعون من وارهم فلوس

المره الجايه ان شاء الله باخذ اكسنت وعساني اسلم بس


واسعار الاكسنت 250 درهم في اليوم هذي للموديلات الجديده يعني 2016- 2017 واللي يقولك اكثر من كذا هذا نصاب وحرامي وللاسف من ضمنهم معلنين في هذا المنتدى

اتركهم وانزل لمحلات تاجير السيارات في المطار او في كازا واترك عنك النصابين اللي يعلنون في المنتدى

والله مشكلة وانا كنت ناوي احجز الرنج السبورت او ايفوك اذا كذا القروشة شكلها اكسنت هههههه
بس المشكلة انك تبغى تنتقل من ديرة الى ديرة وودك بموتر كويس ومريح صراحة

وش رايك ياتعبت احجز بس الرنج ولا خاف يزقون في الجو ؟

والله يابوعلي اني ماكذبت هذا اللي حاصلي طبعا ماذكرت مواقف كثيره صارتلي يعني في اكادير كل شوي موقفني شرطي يشيك علي معي بنات ولا سكران !! برضو اذا رحت الأحياء الشعبيه تبي تاكل من مطاعم او أسواق يتجمهرون عليك صغار وعجايز ويحرجونك علشان تعطيهم لاني السياره شكلها ملفت وتحس كانك غريب وهذا غير في كازا وعطوني مخالفه علشاني دخلت الدوار من بدون ما ادق اشاره!! .. طبعا رفضت ادفع إكرامية ب ٢٠٠ ودفعت المخالفة ٤٠٠ درهم بس عناد فيهم

والله يالغالي انا تفكيري كان زي تفكيرك ابغى راحه المركب خصوصا بين المدن بس اكتشفت ان الموضوع مايسوى كل هالمرمطه والسيارات الصغيرة مريحه برضو في الخط لان الخطوط بين المدن المغربيه كويسه ومريحه للسياره،،

تبي شوري توكل على الله وخذ سياره صغيره

انا راح اسوي كذا ان شاء الله بسفرتي الجايه

نفس الموقف صارلي طريق كازا مراكش بعد نقطة الضرايب في نقطة تفتيش للشرطه. الطريق كان سالك ولا يوقف احد وبعد ما طلعت انا من نقطة الضرايب نزل العسكري سيراتهم وجاي جري لي وقفني وقال رخصه والاوراق. اعطيته قال تعال معاي رحت معاه قال انت ماشي 131 متجاوز واعطا الاوراق والاستماره . الثاني هههه. قالي انتا ماشي ب 170 قلت مو صحيح. وعطيني صورة الكاميرا اوالرادار وبعد اخذ ورد قلي تحلف ما كنت تسرع. حلفت له وقلت انت تحلف اني امشي بسرعه 170 قال. لا ههههه بعدها انتو اخوانا السعودين ما بتقصرو معانا

__________________
.