تقرير بسيط عن رحلتنا : كازا - شفشاون - طنجة بتاريخ 4/7/2019

y666 · 2019-07-16T17:41:26+00:00

السلام عليكم ورحمة الله وبركاته اولاً : هذا اول موضوع انزله ف المنتدي ، واتمني إن يحوز ع ذائقتكم. ثانياً : الهدف من السفرة للنقاهه والراحة بعيداً عن ضغوط العمل والحياة ، ف كان الهدف رحلة ومتعة ف حدود المعقول ، بدون خساير تجعلك عند العودة تضرب كف بكف والندم اكلك ، ولايوجد مانع بخفظ التكاليف إن حصل مع المحافظة ع جودة السكن. ثالثاً : البرامج المستخدمة : للخرائط : قوقل ماب + قو هير + WAZE ، للاماكن السياحية : ترب ادفيسر ، للسكن Airbnb + معارف قديمة رابعاً : الطيران كان عن طريق الخطوط الخليجية ، التذكرة ب 2320 ريال ، وخط سيرها من المنامة ع كازا بس توقف ب ملقا للمدة ساعة ، والرجوع دايركت كازا المنامة طبعاً ما خلونا ننزل من الطيارة ، و ع كازا (ملاحظة : ف الطيارة شفت تصرفات غريبة وهمجية وكمية وصاخة مهولة ، انا متاكد لو ان التصرفات كانت من خليجين او من سعوديين لا نعتونا بالوصخين والبدو وعالم همج بس عندهم كنز النفط ومن الكلام هذا ، وجهه نظر شخصية) الجوازات فاتحين كاونترات ع اليسار واليمين القديمة كلها شغالة مع الجديدة (وقت الوصول 6:30 صباحاً)، يعني عدد ممتاز للشبابيك ، الخدمة سريعة وسلسة ، لما وصلت شاف الجواز ، ورمي الكرت ع جنب وقعد يعبي البيانات بالكمبيوتر ، وختم الجواز ونزلة عندة ، انا اشوفة ومبعد عن الكاونتر ومعطيعها وضعية اللي ما يعرف شي ، شوي حط الجواز ع الكاونتر وطلب بكل هدوء وابتسامه اكرامية ، قلت ما معي واخذت جوازي ومشيت وانا ف حالة صدمة مع السرعة والسلاسة ، خويي ع الكاونتر بس بعيد عني ، مسك جوازة وقالة عطني اكرامية ورفض ، قال راح احولك هناك ويشار له ع مكان بعيد وقال راح اخليك تتاخر ، ومد له بالجواز 100 درهم ومشينا ، طبعا متغير المطار والموظفين نفسيتهم حلوة ، واللي تحت احسن ، ما اخذنا وقت بسرعة الاجراءات خلصت. الخطة كانت 2 ليلتين كازا ، 2 ليلتين شفشاون ، 3 ليالي طنجة ، 2 ليلتين كازا ، وعلى الطيارة. الشريحة المرة هذي غيرت انوي واخذت اتصالات المغرب لاني ماشي الشمال وتوقعت ان الابراج بتكون احسن ، بس مع الآسف مافية فرق. اخذتها ببلاش وعبيتها من البقالة جنب الوفا كاش ب 150 درهم 10 جيجا و 500 دقيقة مكالمات. السيارة لقيتها برا ، طبعاً تم التنسيق مع الاخ ابو مالك الشمري (كل الشكر له والترتيب المميز والسيارة النظيفة) ، لقيت السواق جاهز برا بالسيارة واعطاني ايها ومشيت ، طبعاً الوقت وجهازية الاوراق تفرق ، والعادة اللي كنت اعاني منها بالمطار انهم يعطونك سيارة شوي وتطفي ، والحمدلله لقينا السيارة معبية. (ملاحظة ووجهه نظر شخصية : لقينا العقد واوراق السيارة من استمارة وتامين ومدري ايش جاهزة ، هذي تختصر وقت عليك خاصة انك جاي تعبان من السفر وساد نفسك المطار ، السيارة مغسلة ونظيفة من داخل وبرا ، السيارة ممشاها قليل وتعطيك جو ع الفلوس اللي معطيها، طبعاً انا تفرق معاي لاني بمشي للشمال وراجع تقريباً مسافة طويلة ، وتحتاج شيء مرتب ، تاكد من الكفرات وماء السيارة للحرص خاصة اللي مثلي بيمشي مسافات طويلة ، طبعاً هذي ملاحظة شخصية بس ذكرتها للفائدة ) والشكر موصول للاخ ابو مالك وعبدو. طبعاً السيارة رنج ايفوك ب 800 درهم لـ 8 ايام ، نسيت لا اقولكم ابو مالك فكني من سالفة ارهن جوزاك ولا تامين فلوس والافلام حقت محلات الايجار. السكن ف كازا ، سكنا عن طريق معرفة قديمة بالمعاريف ، ليلتين ، كل ليلة ب 1400 درهم ، شقة صالون ومطبخ وثلاث غرف وحمامين ، مع الشغالة. جيدة. سويت مساج وحمام مغربي ف انفا ستايل ، يطلع ف قوقول ماب بـ 400 درهم ، الحمام جبار ، بس المساج يعني مو ذاك الزود ، بس الاهم اخذت وقت وهي تمسج هههه. الشيشة شيشنا بمقهي Boss ، قريب مسجد حسن الثاني ، يفتح ع الكورنيش ، ومرتب وزين ، بس الاسعار مبالغ فيها جداً ، الشيشة التفاحتين ب 100 درهم و ومكس فروت اللي يسمونه LOVE ب 150 درهم ، والنص نص ب 30 درهم ههههههه ، بس الشيشة كايفففففففة من الاخر ، طبعاً جوة رايق ، كلن يجي يشيش ويمشي ، بالليل يصير شوي موسيقي واغاني وزحمة. الجو رايق جداً ب كازا وبالليل بارد وهواء يرد الروح ، سبحان الخالق. (الجميع من يمر من جنبا يسلم علينا ويقول انتم خليجين نقول نعم ، يقول خل جوالك بجيبك ولا تطلع فلوسك ، الجميع كان يحذرنا ب كازا من سالفة نشل الجوال). بالنسبة للمطاعم اي مطعم يجوز لنا شكلة نوقف وناكل فية. بعدها مشينا شفشاون ، الطريق إلى شفشاون تقريباً 5 ساعات ، ساعتين مع الطريق السيار ، وبعدها فرقنا ع طريق ثاني ، فرعي خط واحد ، يمر بمزارع كثيرة وقري ، متعب وممل للسواق والمعاون مبسوط ، لان فية باصات متتكررة الوقف من غير الحراثات اللي ما تعدي 10 او 15 كم بساعة ، بس مناظر ومزراع رائعة. الوصول للـ شفشاون بعد 5 ساعات بالسيارة ، البلدة صغيرة وكلهم يعرفون بعض ويعرفون انك جديد ع الديرة هههههه ، وتلقي برا السمسارة بمفاتيحهم ع الطريق يعرضون عليك الشقق ، البلدة صغيرة والمعروض للسكن مقبول نوعاً ما ، بس رخيص ويعتمد ع قوة التفاوض معاهم ، اخذنا استوديو كل واحد ب 300 لليلة ، مقبول نوعا ما ، لان الديرة اصلاً بسيطة التجمع والمحلات والمطاعم اغلبها ب الساحة اللي عند القصبة ، الديرة باردة وجوها حلو ، بس الظهر شوي حر ، القصبة ومحيطها من مطاعم وبازرات رائعة جدا ، رخيصة ، الجمال بكل مكان منتشر ، اغلب السياح اوربين وكوريين ، بس حنا ممكن اللي شعورنا سود ، الشقار والعيون العسيلة بكل مكان ، فيها القصبة والساحة ، وشلالات اقشور طبعاً فيها مشي ساعة او ساعتين ، وبدايتها فيه بركة مع سد و مطاعم ومحلات صغيرة ، الديرة هادية وبسيطة ، لمن يرغب التمشي والهواء العليل ، والهدوء ، تراثية وقديمة ، ورايقة ، جلسنا يومين وتوجهنا طنجة ، الطريق من شفشاون إلى طنجة متعة ومناظر وجمااااال جبار ، الطريق تقريبا 5 ساعات او 4 ساعات ، ف طنجة اجرنا في العمارة اللي فيها مقهي اسطنبول ، الليلة بـ 1200 درهم. تحت في مقاهي 3 ثلاثة ، شيشنا في مقهي لولوة الشمال ، اغلبه خليجين ، تعشينا بمطعم wood مقابل مقهي اسطنبول ، الاسعار مبالغ فيها ولا يستاهل. طلعنا لـ منتزة الرميلات ، و شاطيء اشقار ، ومنارة سبارطيل ، طبعاً رحنا من طريق الكورنيش ، مناظر ولا اروع ، شيء جبار ، وقفنا عند الرميلات إلا فيه نزول للغابة تحت ومشينا ، الطريق واحد إلى الالتقاء البحر المتوسط بالمحيط ، بعدين تفرق يمين للمنارة سبارطيل ، ويسار للشاطيء اشقار ، كلها قريبة من بعض و ع طريق واحد. وبعدها رجعنا كازا يومين قبل الرحلة. ملاحظات : وقفنا الدرك ثلاث مرات وحنا رايحين الشمال ، 2 منها كان معاه حق ، والثالثة اخذنا بالسوالف ولا درينا وش المخالفة ، جميعهم كان طيبين وقابلين للتفاوض ، ومالهم دخل باللي معاك بالسيارة ، بس وجيههم سمحة وطريقة تفاوضهم لطيفة. السكن لا تنخدع فيه ، لان الكلام غير والواقع غير ، والسعر المعطي غير وبعد التفاوض الجاد غير. لا تتعلق بشيء محدد (وحط تحتها خطين) وجرب كل شيء ، ف البلد جميل وما تكتشفة اجمل ، ولكن يبقي للبداية ذكري لاتنسي ، سواء مكان او شخص. ولا يخدعونك بمسالة الامان ، البلد احترم تحترم وانت ماشي ، محد له دخل باحد. الافضل للي يشيش ياخذ شيشته معاه ، حنا كان افضل قرار اننا اخذنها معانا. انتبه للسيارة اوراقها كاملة ، اللي يبي يمسك خط مثلي ويطلع برا كازا يتاكد من الكفرات + موية السيارة + لفة ع السيارة ما تاخذ دقايق اخذت معي بندول وعلاج مغص وحاجات خفيفة تكفيك عن لفة ع الصيدليات بالنسبة للشاطيء اشقار : هم 3 ثلاثة جنب بعض الاول مدري وش اسمه ، المساحة الرملية بين المواقف والشاطيء بعيدة ، بعدين يجيك بن قاسم ، وهو اللي جلسنا فية ، المواقف جنب الشاطيء ، ومجهز بممر من المواقف للشاطيء ، دورات مياة ونظيفة ، الالعاب بسيطة للاطفال ، باعة متجولين بقالة صغيرة. والثالث اللي هو اشقار ، مواقف وتنزل درج طويل لتحت من المواقف. محطة القطار ف طنجة: جبارة وفخمة وتنزلك امام المول ، جميع الخدمات والفنادق والشاطيء قريب منك ، لمن لا يرغب بأستجار سيارة ، كل ساعة رحلة للكازا. خلك ذو خلق حسن تملك العساس والسمسار والمالك ، وخلك ع حسن التعامل حتى النهاية. امتلك حسن الخلق والتفاوض تملك الجميع. لا تعطي احد اكبر من حجمة، سواء سمسار ، او صديق ، الامور اقل من بسيطة وابسط مما تتصور. اي تصرف ما يعجبك من صديق او صاحب مطعم او ماركت ع طول وووقفه (ولا تجامل ع حساب راحتك او فلوسك) ف الشعب بسيط ويحترم خصوصيتك وعدم راحتك. ‏هذي رحلتنا بشكل بسيط ، اتمني اني ما طولت عليكم ، بالنسبة للملاحظات من وجهه نظر شخصية قابلة للصواب وللخطاْ. ودمتم بود.

y666

مزعوط مبتدء

المشاركات: 38

تاريخ التسجيل: May 2019

2019-08-14, 09:06 PM

المشاركه #26

اقتباس:

المشاركة الأصلية كتبت بواسطة زعرور

بالنسبة لبرنامج Airbnb

هل فيه دفع عند الوصول ؟

ولا بالفيزا ؟

بالفيزا ، ومجرد تاكيد حجزك تنخصم الفلوس دايركت من فيزتك،

وكل مالك له سياسة وقت الغاء الحجز ، هذا تلقاه تحت (تحت مسمي سياسة الالغاء) ،

لان بعضهم يسمح بترجيع المبلغ اذا كنسلت بدري ، وبعضهم يعطيك مهله يومين او يوم قبل الحجز ، وبعضهم يخصم 50٪ من المبلغ اذا كنسلت قبلة بيوم او يومين.

وتختلف سياسة الالغاء بين كل مالك ومالك.

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

الانتقال السريع

المواضيع المتشابهه للموضوع: تقرير بسيط عن رحلتنا : كازا - شفشاون - طنجة بتاريخ 4/7/2019
الموضوع	آخر مشاركة
خريف شمـالي , تقرير مختصر عن ( طنجة , شفشاون , أصيلآ )	2025-04-09 10:41 AM
تقرير سفرتي فبراير 2019 الرباط	2022-08-09 04:53 PM
تقرير رحلتنا إلى المغرب للمرة الاولى (وأتمنى ان لاتكون الاخيره) .	2021-02-01 02:51 PM
تقرير سفرتي لمصر بتاريخ ٢٠١٨/٧/٦	2019-09-16 05:23 PM

الساعة الآن 03:11 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

تقرير بسيط عن رحلتنا : كازا - شفشاون - طنجة بتاريخ 4/7/2019

روابط سريعه