المغرب ١ / يناير

- أغادير حلوة جوّها معقول في الشتاء تجي أيام مطر وأيام غيوم بس جميلة ومب ذاك البرد اللي يمنعك من الخروج او الاستمتاع
- مراكش نعم باردة وبردها قارص بالشتاء بس شفت الرياض بالشتاء اذا جاء يوم بارد هذي مراكش. يعني دبّل البجامة وخذ الجاكيت وأمورك هانية. طبعاً هذا بالليل اما النهار الجو رايق.
- انتبه من الشمال عموما والوسط الشمالي (مكناس افران الخ). هذا مب لنا الا اللي عنده هواية الثلوج والتزلج وشغل الأوروبيين. لان بردهم بررررد ما يمزح وبتعرف ان سالفة (بردنا يكسر العظام عكس بردهم) كذبة لان بردهم مب يكسر العظام الا يشلخك شلخ لازم تكون مستعد بلباس خاص - شراب خاصة - جزمات (الله يكرمكم) خاصة لانها ثلوج وبرد والحركة بطيئة وصعبة اقرب انها مغامرة.

نجي للي اروح لهم انا بالشتاء كازا (غالبا) وطنجه احيانا
- كازا النهار رايق. رائع. مشمس شمس لطيفة تتمشى بروقان. الليل؟ والله برد وشاخوف هوا يشلخ تحتاج جاكيت جبر يجي معاه طربوش وعيش يا امير.
- طنجه برد. لا برد صدق. النهار برد بس معقول بس بالليل بحكم انها شمال ومرتفعة وعلى المتوسط تشبه جو بيروت بالشتاء (اذا تذكر بيروت).

طبعا المدن الصغيرة جوّها غالبا نفس جو المدينة الكبيرة اللي حولها
الشتاء ارشح:
1. أغادير
2. مراكش
3. كازا

وسلامتكم

سلمت يالغالي وشكرا على المعلومات الثمينة باين عن عن تجربة .
كنت أظن أن عندهم مدن نازلة ودافية مثل جيزان عندنا لكن اتضحت الرؤية وشكرا ........

حياك الله
زي جيزان وجدة دافية مرة بالشتاء اقرب شيء اغادير بس تراها شوي برد امممم ممكن وجدة؟ وجدة قريبة من البحر واعتقد مو باردة مرة بالشتاء بس مو متأكد ما قد رحت لها وهي بعيدة بمرة بأقصى الشرق على حدود الجزائر واعتقد على مستوى سطح البحر يعني مو مرتفعة فجوّها اتوقع معتدل بالشتاء بس ماهي مدينة سياحية ولا فيها شيء وشكلها مملة.

الله يحييك وأشكرك على المبادرة وسرعة الإجابة .
إذا وجدة مدينة صغيرة وبعيدة و غير سياحية ويمكن أهلها محافظين بزيادة فماتصلح للزيارة فمجرد إضاعة وقت .
ونا حصلت درجة حرارة أقادير الصغرى 5 والعظمى 20 في فصل الشتاء ولا أدري عن صحة ذلك .
تحياتي