17 مايو

من وجهة نظري ... السفر لغرض السياحة في هذي الفترة غير مجدي لان الاوضاع في المغرب جدا متلخبطة. اخذت تصريح ورحت الوضع كان حجر وكان ممل . وحسب الوضع هناك وان المتحور نشط فالوضع كل ماله يصعب. فيه ايجابيات كثيرة من كورونا العرض كان اكثر من الطلب .... بس ماهو الروح اللي انت تبي من صولات وجولات. اعتقد اللي ذكرته مفهوم

... يفتحون في التاريخ المحدد. نبغي نشوف الاوضاع هناك. تعرف لو تقول لي حجر ومن الساعه تسع الا ست الصباح وكلش مسدود. عادي وبنمشي وخل الصولات والجولات علينا ههه... نبغي نروح ونرجع ماحنا مهاجريين. هههه وعلى اول رحلة وجهه نظر. نعرف نتعايش هناك ،،. الاصل كل العالم الحين مشاكل الكورونا. لكن السفر راحه نفسية. تمحي فيها مشاكل الدنيا وتعيد نشاطك يعني بالعربي ضروري جدا. والمغرب من البلدان تقييم الأخضر بالنسبة لكرونا لحد الحين يعني تمام. واللي يبغي يسافر للبلدان اللي كذا للسلامة.

منور اخوي ولد الشرقية هذا الكلام الصحيح اذا ماتسافر وتنبسط ولا اقعد في ديرتك لحد ماربي يفرجها

هلا ابوسمير صباح الخير لك وكل الاخوان بخصوص السماح فأعتقد نعم لكن بشروط مثل التطعيم والمنع عن بعض الدول وما استبعد انهم ممكن يأجلونه بسبب خوفهم من السفر الجماعي للشعب ممكن مسوين استطلاع ولقوا فيه طلب كبير على السفر واعتقد ان لندن والمغرب بتكون وجهات عليها ضغط كبير فالله أعلم وش بيصير

بخصوص اللي كلمك وقالك بيفتح كل شيء بعد العيد اعتقد ما عنده سالفه ويتأمل اذا المقاهي مهب فاتحه برمضان وش عاد غيرها بعد العيد

بخصوص اللي يقول ما راح تكون مثل قبل فهذا صحيح لكن هذا افضل بالنسبه لي لان اهم شيء عندي بالمغرب الجو الزين والهواء النقي والتأمل والتصوف السفر بالنسبه لي مو فعاليه هنا او هناك السفر شمس تشرق وصبح يتنفس وشمس نهار لطيفه وليل يسكن وجو عليل وهوا ينسم من مفرق الوادي ومطر بتموز ورذاذ ب آب وبرد بأيلول ! فتأمل . اعتقد ان المغرب حاليا افضل من اي وقت مضى للسياحه لذلك ودي اروح بسرعه اقسم بالله لو يحصل لي صمت رمضان هناك وعيدت هناك لكن لعلها خيره

هلا حبيب طنجة. وهلا بطنجه كلها العالية وكاسبراطا وكاب سبارتيل ههه
خل اللي يبغي يجلس يجلس.يترقب الاوضاع مثل اللي مايبغي التطعيم،، واحنا بنروح نتصوف مثلك. يعجبنا الجو البارد والشوف الزين. واسبوع حجر بطنجه واسبوع حجر بتطوان وخل اغادير ختامية. متى نمشي بس. تحياتي

ارحب يالمهتم طنجه تنادي وقلبي عيّا يلبّي ندا المنادي
الا ياململم جروحك
ومعزم لها تطلع
أخاف يطول عليك الدرب
ومن نص الطريق ترجع
ههههههههههههههههههه الصمله يارجال 17 مايو يعني 17 مايو انا بلحقكم بيونيو ان شاء الله اجازتي تمام وكل شيء تمام بس مانبي صملة عوض خميس والنكبه الشهيره لووول

واللي هو مو قد الشوق
لا يعشق و لا يهوى
لا يكابر و يقول أقدر
مدام قليبه ما يقوى

ماعليك زود يابوسمير الحقيقه الشوق ترند لهناك وما بعد يونيو حزيران الا الشقا والاحزان نبي نروح لو على قارب او على ظهر حصان الله وكيلك صرنا شعراء هذا الزمان

هلا ب كنبغيك ومساء الخير والنور
التصوف اسمى درجات العشق الانفصال التام عن كل الدنيا وماديتها وملذاتها ونقل الروح لعالم الحقيقه للحب الالهي السامي اسمى درجات الحب مثلما يقول مولانا ابن الفارض طيب الله ثراه
زدني بفرط الحب فيك تحيرا
يامن بالجمال والجلال تدثرا
باختصار بلغتنا هي الزهد وتهذيب الروح وتذكر الغايه من الوجود والتصوف معروف ومشهور بالمغرب وله اماكنه وطقوسه وانا احبه ومتعلق بشعراء التصوف وبس .........

هلا فيك حبيب طنجة راقي وفخم من يومك الله يسعدك