تحويل وست يونيون

هلا بك يالغالي خذ العلم الوكاد وأنا اخوك أنا دايم أسافر وما يمر شهرين الا أنا مسافر واقعد فترات طويلة الكاش نصيحة لا تأخذ أي مبلغ كبير لأي بلد سواء مغرب او غيره الا في حالة واحدة أن البلد اللي مسافر له ما فيه أي وسيلة كاش هنا الشكوى لله محدود الواحد وش يسوي واغلب بلدان العالم فيها خيارات ومتطورة الا بعض الدول المتخلفة ولا اتوقع ان احد بيروح لها الا لضرورة او لعمل ام غيره الله يعينه .

ونجي لصلب الموضوع بالنسبة لخيارات الصرف في أي دولة أنا ما اتكلم بس عن المغرب أنا اتكلم عن اغلب الدول وهاذا شي مطبقة فيها كلها :
الأفضل خل معك كذا صرافة و قسم المبلغ على كذا صرافة للاحتياط من باب ان وحدة ما اشتغلت او فيه تحديث في البنك ذلك اليوم اللي جيت تصرف عشان تتفادى انها ما تسحب والأفضل من وجهة نظري بلا منازع في الوقت الحالي عندك ثلاث صرافات بالترتيب من الأفضل .
1- بطاقة السفر من السعودي للاستثمار .
2- سفر بلس من بنك الراجحي .
3- بطاقة مداد متعددت العملات من بنك البلاد .
مع العلم انا عندي بطاقة ائتمانية لزوم اجار السيارات في بعض الدول اللي لازم بطاقة ائتمانية لان بعض الدول ما تقبل الكاش او بطاقات مسبقة الدفع خاصة في ايجار السيارات .
والبطاقات هاذي كلها عندي وطبعا حقت الراجحي والبلاد مطلعهم وقت العروض ومجانية مدى الحياة .

وملاحظة بالنسبة للمغرب اغلب الفنادق والمطاعم والكافيهات ومحطات البنزين والتسوق مثل كارفور ومرجان وأسواق السلام تقدر تسحب بالبطاقة بالشبكة حتى العصير في كارفور تقدر تسحب بالشبكة يعني الكاش ما راح يستخدمه الواحد الا في المحلات الصغيرة او في تعامل شخصي حتى راعي السيارة والسكن إذا بينك وبينه علاقة تقدر تحول ويستر وما انصح ان احد يحول لشخص الا في حالة وحدة انه يكون بينه وبينه علاقة وسبق ان تعامل معه فالكاش بالعربي ما راح احد يستخدمه الا مع الطير .

وثانيا بالنسبة لويستريونيون الأفضل بلا منازع بنك البلاد وثانيا STC باي أنا ضايف نفسي فيهم كلهم واذا احتجت كاش احولهم في نفس اللحضة وتوصل علطول وأخذ رقم الحوالة وجوزاي وأقرب فرع لويستر واسحبها مع ملاحضة اوقات الدوام مهوب يجي واحد مطفي النور ما يخلي معه ولا ريال وتمسك معه اخر الليل وهو مرتفع ويقول أنا طفران ويمرهم على الساعة 2 وبالنسبة لكل عملية حوالة مبلغ 23 ريال وبالنسبة للمبالغ عادي تقدر تحول لنفسك مبالغ كبيرة عادي مع أن ما عندي علم عن الحد الاقصى بس لو بغيت حتى 30000 ألف درهم يمديك تسحبها في يومها .

حتى دايم إذا بغيت امدد الشقة والا السيارة احولهم عن طريق ويستر ومريح دماغي مع العلم ان سعر التحويل عن طريق بنك البلاد ممتاز جدا وافضل حتى من سعر الصرف في المغرب نفسها عن واقع تجربة .

وبالنسبة للسحب من الصرافة أنا ما اسحب منها الا نادر جدا أنا تمر علي سفرات كثيرة ما سحبت من صرافة مع تحياتي للجميع .

أسوأ شي stc pay من ناحية الصرف

أفضل خيار للتحويل بالترتيب (وسترنيون أو مونيغرام)

يورباي (أفضل خيار ودايم يسوون عروض)
البلاد
الانماء (فيها عيب ممكن تتأخر الحوالة ساعة أو ساعتين)
الراجحي