مثل ما شرحت لكم سابقا .. سكنا في كوخ كبير و جميل في قابالا .. اليوم الثاني رحنا نفطر في نفس المطعم اللي تعشينا فيه Soyuq Bulaq Gabala Restaurant لان تقييمه مرتفع و قلنا ما يحتاج نغير هو الفطور نفسه في اكثر المطاعم .. خدم علينا نفس الشخص حق العشا و سالنا انتوا من السعوديه قلنا ايه قام يتشكى ان وضعه صعب و ان حالته الماديه مو بزينه قلنا الله يعيننا و اياك و كنا ناوين نكرمه عند الانتهاء من الفطور و لكنه باغتنا بفاتوره عاليه قيمتها 141 منات لفطور عادي ل 3 اشخاص .. سالته ليش كذا قال هذي تسعيرة الاداره و مدري كيف .. لاحظت ان براد الشاهي ب 25 منات قلت له الشاهي غالي جدا قال هذي اسعارنا قلت له مو صحيح احنا متعشين عندكم ب 126 منات كيف نفطر بأغلى من العشا .. قام يتمتم بكلام ما اعرفه و يتافف عرفت انه ينصب علينا حاسبته و مشيت .. رحنا لمحطة التلفريك كان استقبالهم غريب و اسلوبهم غبر ودود .. طلعنا مرحلتين فقط الين وصلنا للمحطة الثالثة عند فندق طوفان داغ .. كان فيه سياح قليلين و اكثرهم اجانب .. رجعنا للمطعم اللي براس الجبل اللي فيه المحطة الثانية .. قابلنا 3 سيدات عرب جايين من دبي و كانوا يتذمرون بشده من المكتب السياحي اللي مرتب لهم الرحله .. اتنصب عليهم في بقالة محطة البنزين و هم جايين من باكو لقابالا .. ايضا تعامل الفندق اللي في قبالا هو 5 نجوم لكن لا يتجاوز 3 نجمات و كان الريسبشن يقفل السماعه اذا اتصلوا يطلبون منهم شي .. لاحظوا نفس ملاحظاتنا على الشعب انه متجهم و غير مبتسم و يحاول يستغلك و ينصب عليك و كانوا ينتظرون بس متى يطلعون من هالبلد .
اجمالا، قابالا بشكل عام مكان بدائي و الطبيعه في وقت زيارتنا كانت نهاية خريف و كان الشجر مصفر و الارض ناشفه و الحقيقه ما كانت تستاهل الزياره لانها اصلا مافيها الا التلفريك الي ما يستاهل التعب .. المهم قررنا ان يكون غشانا ( غدا عشا ) ذاك اليوم مشويات في الحوش حق الكوخ عالمسبح لان مكان الشوي جاهز و الكوخ جميل .. رحنا ندور كباب لحم و اوصال دجاج في كل البقالات الكبره في قبالا و عند كل القصابين و ما حصلنا .. امضينا 3 ساعات ندور و تواصلت مع صاحب الكوخ و قال كل شي موجود و يرسلني للبقالات و القصابين و ما حصلت شي اخيرا قال خلاص بارسل لك واحد تروح معه عند قصاب يقطع لك لحم و تاخذه تجهزه انت للكباب في الكوخ عندك .. قلت له لا خلاص ما دام الشغله كذا فماله داعي .. قال ترانا هنا نسوي كذا قلت ليش ممشورني من اليوم 3 ساعات طالع نازل شوارع قبالا بسياره ما فيها فرامل و النهاية كذا، قال معليش هذا اللي عندنا .. غيرنا الخطه و خليناها بيتزا من مطعم كبير جدا مبني فوق حوض سمك .. تعاملهم كان كويس و اسعارهم بالمنيو و لطيفين الشباب الى حد ما.. قررنا اليوم التالي نرجع باكو و كانت المعاناه السياره بدون فرامل و الطريق طويل و ما فيه خدمات و ممل جدا لكن قضيناها سواليف و كذا الين وصلنا فندقنا اللي حجزنا فيه اسمه courtyard by Marriott .. فندق جميل و مرتب ارتحنا فيه .. عند تسليم السياره وضحت للمكتب انه ما يصير يعطوني سياره منتهيه فراملها و اني عانيت منها في الطريق و من هالكلام .. و الله مافيه احد رد عليه او اعتذر .. ناس ليس لهم علاقة بالسياحه و الاستغلال مستشري فيهم .. قضينا وقتنا في شارع نظامي و الكورنيش و اليوم الاخير اخذنا اغراضنا و على المطار .. طلبنا بولت و جانا واحد سيارته من الستينات و نفسيته قافله و محمل معه جراكل زيوت قلت لصاحبي خلاص كنسل هذا و شف واحد غيره قال خلاص خلنا نمشي شكلها خربانه خربانه .. حاط اغاني اذريه و رافع الحراره في السياره و ما يتكلم مدري اش فيهم حقين بولت دائما مقفلين .. وصلنا المطار و ضبطنا امورنا و كانت الامور كلها سهالات .. افطرنا و تجولنا شوي بالمطار .. مطارهم صغير لكنه مرتب و حليو .. جت طيارتنا و ركبنا و خلال ساعتين و نصف و احنا في الرياض بفضل الله و نعمته .