حفظ البيانات؟ هل نسيت كلمة المرور؟ تسجيل عضوية جديدة

تقرير سفرتي الأولى - أكادير

أبو هزاع · 2023-12-22T04:46:43+00:00

م2023 مرحباً بالجميع من باب رد الجميل مثل ما استفدت من هذا المنتدى الكثير من المعلومات حاب افيدكم واعطيكم تقرير مفصل رحلتي للمغرب وحداني من جدة الى اكادير ترانزيت كازا ساعه ونص التذكرة كانت ذهاب فقط ب 1300 ريال سعودي مدة الرحلة 14 يوم اقلعت الطائرة من جدة واغلب الركاب كبار في السن وعوائل اعتقد انا الخليجي الوحيد في الطائرة بحكم انه مافيه موسم اجازات ولا اعياد اقلعت الطائرة بصراحه الابتسامه ماتفارقني بما انها اول سفرة انام نص ساعه واصحى ساعتين وعلى هذا الحال طول الرحلة هبطت الطائرة وتسمع صوت التصفيق والضحك هبطت الطائرة وكلمتني سيدة كبيرة في السن باين عليها في بداية الستين طلبت مني اساعد زوجها المسن وساعدته ونزلنا من درج الطائرة وبدون مبالغة اكثر من سبعة دقائق وهو يشكرني ودعاء لي وهذا اللي فرحني كثير وصلنا كازا كان الجو بارد وارتعشت من البرد ماحسبت حساب الملابس الشتوية وصلنا المطار وتوجهت لقسم مواصلة الرحلات ومعاي تقريباً عشرة كبار في السن ، ساعدني يا ابني، وين اكادير، "؟ ابشرو يا اخالتي تعالي معايه صارو كلهم وراي ماشيين بين الممرات لين حسيت اني قائد الفريق ههههههه وصلنا لصالة الانتظار ونفس الموضوع ماشفت اي خليجي تقريباً انا الوحيد، صار وقت رحلة اكادير وهنا الصدمة الطائرة صغيرة بمراوح يستخدمونها كل مطارات العالم للرحلات القصيرة جداً صراحه انا خفت صوتها قوي جداً ومافيها تواليت اكرمكم الله ولا وجبات ولا اي شيء وصلنا اكادير عاد هنا مافي شيء اسمه باص يوديك من المدرج للصالة تنزل من الدرج ومشي في المدرج الين وصلنا الصالة دخلنا للجوازات كل شيء سهل سألني عن الفندق وجاوبته وختمت الجواز ومشيت ورحنا للتفتيش وكل شيء سهل مافي اي تعقيد نجي هنا للاكشن شوي رحت لتبديل العملة وبحكم انه معاي مبلغ كبير طولت كثير عند تبديل العملات وهو يعد بيده ماعنده مكينه وكل شوي يغلط ويرجع يعد مره ثانيه وانا اغلط وارجع اتاكد وكل الصالة صارت فاضيه جميع الرحلات وصلو وخلصو وراحو وشنطتي لحالها تدور في السير وانا عند تبديل العملات وكل موظفين المطار صارت نظراتهم فيني والوقت متاخر 3 الفجر والاوراق النقدية صارت اربعة حزم او رزم وانا احطها بجيبي صراحه شعور يخوف، طبعاً انا من النظام القديم احب اشيل الكاش بجيبي اغلب مصاريفي بالكاش ما عدى الفندق سمعت عن وفاء كاش لكن انا مااحب اسحب كل شوي، اذا بتحافظ على فلوسك وحريص تنفعلك طريقتي، طلعت للطاكسي وقلتله فندق صحارى 200 درهم التسعيرة مكتوبة رحت للفندق اخذت الشاليهات اللي بره يومين واذا عجبني امدد ب 1500 درهم اليوم الاول راحه،، الفندق هادئ ومريح للنوم عكس ماسمعت عنه اتوقع لاني جاي موسم دراسه وامتحات وكان فاضي الخيمه ماكانت شغالة بعد يومين قررت اغير الشاليه ماعجبني معزول عن الناس واخذت غرفة بنفس الفندق 1200 درهم طبعا كنت بدفع كامل المده المتبقية 12 يوم لكن موظف الاستقبال محترم جداً قالي لاتدفعها كلها ممكن يحصلك ظرف ادفع نصها ، بالنسبة للمواصلات ما استاجرت سيارة لاني من محبين السهر واذا بسوق لازم اكون مركز، الطاكسي الاحمر لداخل اكادير والابيض للمطار او خارج اكادير اغلب مشاويري ماتتعدى 30 درهم بالعداد طبعاً واهم شيء اول ماتركب قوله شغل العداد، ماعندهم اوبر عندهم تطبيق مثل اوبر اسمه ان درايف بس سمعت انه موقانوني وممنوع لكن ارخص بكثيييير من التكاسي للمشاوير البعيدة، الاجانب والخواجات عددهم كثير لانه باوروبا ثلوج تحت الصفر ف يجون هنا بالنسبة لهم دفئ والهنود والباكستان موجودين بكثره وهذا اللي اسغربت منه، انا نظامي اصحى العصر تمشيه خفيفه غداء وتمشيه وبعدها عشاء وراحة كم ساعه بالفندق وبعدها اسهر واجع الفجر على شهرزاد الين 7 الصبح وافطر بالفندق وانام وهذا الروتين اليومي لمدة 14 يوم شهرزاد ماعجبني ابداً ابداً لكن صار عادة الافتر فيه وشلون لاتسالني هههههههه .....بالنسبة للصرف...... كلفتني السفرة 17000 ألف ريال سعودي تقريباً - 45،300 ألف درهم مغربي تقريباً .. من غير الطيران، طبعاً لا احد يعيد الحساب بعدي ويقولي حسبتك غلط لانه فيه مصاريف شخصية واشياء اخرى ماصرحت بيها لكن بشكل عام يعني .. مصاريفي الاساسية غداء وعشاء بره انا والعشير والفطور داخل الفندق التسوق اشتريت الأملو طحنه قدامي والقفطان او الفستان المغربي من سوق مثل سوق الاحد اسمه ((انزكان)) لكن هذا السوق شعبي جداً جداً مايجونه سياح كثير نادراً ارخص بكثير من سوق الاحد لكن لازم يكون معك احد من اهل المغرب وانت تكون ساكت ماتتكلم عشان مايعرفون انك سائح او اذا تعرف الهدره المغربية يكون افضل ، انا العشير فادني كثير بالنسبة لهذي النقطة، اماكن السهر تقريباً جربت اغلبها لكن انا طبعي غريب شوي احب الاغاني المغربية او يسمونها اغاني الرآي، المضحك اني بعض الاغاني ما افهم وش يقولون لكن تعجبني طبعاً الاماكي اللي مثل كذا نادر جداً تشوف فيها خليجي لكن للامانة وجدت الترحيب والابتسامة وحسن التعامل من اخواني المغاربة، طبعاً نظامهم مايحسبون الطاولة نظامهم تحاسب على طلبك فقط يعني الشيشه وكذا، عكس اماكن السهر للخليجيين اقل طاولة 1500 درهم لشخصين مع الطلبات طبعاً احلا شيء بالسفر وحيداً هو الاكتشاف رحت مكان للسهر بالصدفة دخلته للامانة جازلي المكان اغاني مغربية صحراوية وعزف عود اسمه اتوقع Ibiza, قريب من صحارى، السهرة تبدا من 12 الى 2 .. المغرب بلد جميل جميل جميل لابعد الحدود الناس محترمين وراقيين اللي شد انتباهي هو ثقافة السكان وأدبهم، حتى لو قابلت بشخص لم يدرس ولم يتعلم تجده لا يقاطعك بالحديث ويحترم الكبير ويبتسم للغريب وكريم الطباع، طيبتهم وثقافتهم تولد معهم من الصغر، وليس بالدرجة العلمية او الجامعية، لديهم احترام وتقدير للسائح فاق كل توقعاتي وهذا اللي اللي تعجبت منه، ترحيبكم يا عرب ليّ لاعدمته ماشفت مثله ولا باي ديره الأولى مغربي يعتذر لاعزمته يبي يكرمني قبل العزيمة والثانيه يزعل لا سهيت عنه يخاف يكرمني واحدن غيره بالنسبة لمن يبحث عن الجمال بناتهم الجمال والأناقة والإحترام واللطف في اي مكان تبتسم لك موظفه عاملة استقبال كاشير من زود احترامهم ماتدري هي نظرة اعجاب او مادرت عنك اصلا هههههههه، ... بتكلم عن نقطه بالنسبة للسكن واماكن السهر هي انه الاغلب يقول ابعد عن اماكن الخليجيين وانا اشوف العكس، نحن اهل الخليج فينا طيبه وكرم لايقاس بمقياس حصلت لي مواقف كثير اللي يعزمني وانا ما اعرفه واللي يحلف مااحاسب وهو يدفع الحساب، وطحت بمشكله وساعدوني،،،واشياء كثير، لما تكون ساكن بمكان كله خليجيين صحيح بتكون الاسعار مرتفعه لكن تأكد وخذها مني انه لو حصل لك اي شيء طارئ مابتتعب ولا بتشيل هم طول ما انه الغرفة اللي على يمينك وشمالك وتحتك وفوقك ساكنينها خليجيين،،، دائماً اترك انطباع جميل عنك واحترم الناس ولا تتكبر على احد ، لاباس خويا ، عافاك، كيداير لاباس، يعطيك الصحه ، كلمات من ذهب اذا سمعها المغربي من خليجي بتشوف الابتسامه شاقه وجهه... بالنسبه لطريقة حفظ الكاش والوثائق المهمه بعطيكم طريقتي اللي اتبعها في السفر دائماً ما اعترف بشييء اسمه خزنه او سيفتي بوكس، طريقتي ابحث عن مكان في الغرفه اول ما اوصل ويستغرق هذا مني قرابة الربع ساعه الى ان اجد المخبأ المناسب هههههه حتى لو طلبت خدمة نظافة الغرف مستحيل انهم يكشفون المكان،اهم شيء انك تكتب في الملاحظات بجوالك المكان اللي خبيت فيه عشان ماتنساه وتتوهق بعدين مثل ماحصل معي مره من المرات الله لايعيدها هههههههه ،،،، المطاعم اخخخ يالمطاعم شيء لايمكن وصفه، -مطعم بيت المندي غالباً شخصين 350 درهم -مطعم الفاسية غالباً شخصين 250 درهم -دار الطاجين غالباً شخصين 220 درهم -الصياد غالباً شخصين 300 دهم -مطعم اسماعيل غالباً شخصين 230 درهم -مطعم دولفين باكادير باي غالباً شخصين 300 درهم -ماكدو قدام صحارى غالباً شخصين 180 درهم اللي يبغون منطقة مطاعم كلها كلاس وشيء فخم في منطقة اسمها ((اكادير باي)) بالنسبة للتمشيات : -القطار السياحي ب 18 درهم للشخص -التلفريك - عربة خاصة انت والعشير ب 700 درهم وعربة جماعية الشخص ب 200 درهم -البحر والامواج شيء خيالي بالصبح مو بالعصر عشان الشمس تكون مواجهه للعين -تمشيه بالمارينا -البولينج بالمارينا الاشياء اللي اعجبتني والاشياء اللي ما اعجبتني بذكرها بالترتيب الايجابيات: -نقاء الاجواء على الرغم من كثرة السيارات والدراجات النارية لكن سبحان الله الاجواء احس بنقاء ونظافه -طيبة الناس ولطافتهم وطيبة اهل اكادير -الحرية والانفتاح ومحد يتدخل بخصوصياتك في الاماكن العامة، طبعاً هذا بالنسبة لاكادير -كل شيء قريب منك اكثر مشوار مايكلف 30 درهم -الناس فيهم ثقافه وطبع اوروبي وفرنسي وطيبة وكرم العرب بنفس الوقت يعني مكس غريب عجيب -الاكل المغربي طاجن الحوت والرفيسه والحريره واشياء كثيرة السلبيات بالنسبة لي انا: -اغلب المطاعم المينيو او قائمة الطعام باللغة الفرنسية واشياء كثير في الاماكن العامة بالفرنسي -دورات المياه اكرمكم الله مافيها شطاف او هوز وهذا اكثر شيء عانيت منه -اغلب الاماكن تقفل الساعه عشر بالليل -الصيدليات كلها تقفل يوم السبت والاحد لكن فيه بعض الصيدليات مناوبة للضرورة اخر ليلة : تجهيز الملابس وتبدأ الأفلام والاحزان والتوديع الريسبشن وحراس البوابات واصحاب الطاكسي على بوابة صحارى وعمال خدمة الغرف بدون مبالغة الكل يودعني حبوني كلهم انا انسان بسيط اجتماعي حتى في اقصى مراحل التحليق والطيران وفهمكم كفايه ما اخرب جو أحد ولا افتعل المشاكل وهذا اللي حبب الجميع فيني اتعرفت على خليجيين باكادير ويقولون جوك احلا جو ولازم نكون مع بعض بالسفرة الجايه كلمت الريسبشن طلبولي الطاكسي الابيض يوديني للمطار 300 درهم طبعاً مطار اكادير مايفتح الكاونتر غير قبل الرحلة بساعه سألوني عن المبالغ بالدرهم المغربي ماكان معي غير خمسة دراهم ههههههه قصيدة وأنا في صالة المغادرين : عشقت ارضها وانا باخر العشرين رجعتني لأول العشرين من عمري كأن ما بدنيا غير أهلها الطيبين الطيب فيهم وهذي نعمة من ربي آخر ليلة أهوجس بصالات المغادرين على فرقاك كني طفل فقد حضن أمه من كثر الوله يبكي أكادير طلبتك عني وعن أحوالي تكتبين قصة وله والهام من داخل قلب نجدي اااسف على الاطالة واي سؤال بالخاص انا حاضر

roomil

مزعوط مميز

المشاركات: 477

تاريخ التسجيل: Feb 2017

الدولة: مراكش

2024-01-11, 07:42 AM

المشاركه #5

باقي ما فاق من آثار الزعطه
حمدلله على السلامه

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: تقرير سفرتي الأولى - أكادير
الموضوع	آخر مشاركة
تقرير عن سفرتي للمراكش	2021-02-01 03:04 PM
تقرير سفرتي الى المغرب	2021-02-01 02:32 PM
الرحلة الأولى ،، المغرب لا تستغرب ،، تقرير مصور فيديو	2021-01-29 10:54 PM
سفرتي الأولى للمغرب اولها تعاسه واخرها وناسه ..	2015-09-23 05:07 PM
تقرير عن سفرتي الي جورجيا	2015-08-01 03:19 PM

الساعة الآن 03:52 AM

جميع المواضيع و الردود لاتعبر بالضرورة عن رأي و توجهات الادارة و انما تعبر عن رأي كاتبها فقط

Ads Management Version 3.0.1 by Saeed Al-Atwi

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

تقرير سفرتي الأولى - أكادير

روابط سريعه