قصة الجنية الى حكيت ليها في الحمام
مللي كنت صغيرة يمكن في الخامس أو الملاحظة واحد النهار كنت فالحمام و طلبات مني واحد لمرا كبيرة -ماكبير غير الله - نحك ليها ظهرها ههه واخا سَخَّفني ظهرها كبير بزاف حيث هي مسكينة سمينة
صْبَرْت وماحدها كتشكرني و تقول لي تبارك الله و أنا تنشْنتْ و نَضْصَرْ و نزيد نَفْركْ حتى سْخفت ْ
شكراتني و عاودات لي قصة واقيلا اختارعاتها أو الله أعلم ههه قالت لي
" واحد لمرا شيبانية قدِّي أنا طلبات من واحد البنت قَدَّك... تحك ليها ظهرها ، و ديك البنت ظريفة بحالك حكّاتو ليها مزيان ومللي سالات قالت ليها الشيبانية عندك الزهر أبنيتي أنا راني جنية و بغيت نجربك ، كون ماحكيتيش نشرب من دمٌّك و نمص عظمك ، ورَّاتها رجليها لقاتهم بحال فراقش الحيوانات"
سمعت أنا هاد الهضرة و خفت قلت ماعمري نرفض لشي عيالات طلب فالحمام لا يكوتو جنيات -بسم الله الرحمان الرحيم - يمصو عظمي ويشربو دمي..
صافي مِّي الحاجة ولاَّت حاضياني ، ومع ماكوناش نقراو نهار الجمعة ، غير ندخل للسخون تبان لي حدايا و كترتاح أنا نسقي الماء من البرمة و نحك ليها وحتى لصخاباتها كتديرني طريق باش تتصاحب معاهم و يتهلاَّو فيها ...مللي تنوصل للدار تنكون مدكدكة و سخفانة ، حتَّى ولِّيتْ نكره نمشي للحمام ، وأمي مسكينة ولاَّت تشد ليها كسَّالة وتخَلَّصها و توصِّيها !!
واخا هاكاك كتتسلط عليا الحاجة و كنضطر نحك ليها ولشيبانيات صحاباتها هههه و لحسن الحظ احْكيتْ لواحد الصديقة السر اللي حكاتو لي مِّي الحاجة -قصة الجنية -و مع هي نيَّة بحالي ولِّينا نتقاسمو الظْهُورة ههه
واحد النهار يالله رجعت من
التْحَمحيمة -الجَحِيم- سخفانة و عيانة ونعست باش نرتاح من الأشغال الشاقة ، شوية حلاٌّت الوالدة الدفّة وعينيها فيهم الشر وسولاتني :
" آش هاد شي تنسمع واش ولِّيتي كسالة بلا خباري ؟ أويلي أنا نخلٌّص عليك وأنتي تحكي لعباد الله !! وآشنو مْحَصلة عليك الحاجة وكتهددك بيه ؟ راه الطيابة عاودات ليا كولشي !!"
عرفت اصحاب الحسنات وَصْلُو التبركيكة هي هاديك ..
قلت ليها القصة اللي عاوداتها ليا
بغات تموت بالفقصة وشرحات ليا بأنها اختالقات القصة و استغلات الصغر و النية ديالي..
وقالت لي :
"واش كاينة شي جنية أو شيطانة قدها ؟
راه الجنون هوما بنادم !!"
بلا مانقول ليكم آشنو دارت ليها شوهاتها ونَدْماتها على فعايلها !!!
وعاد تهَنِّيتْ من الإستغلال ديال مِّي الحاجة
الله يسمح ليها
هاد القصة تذكرتها وقلت نحكيها ليكم
باش نعلمو ولادنا يصارحونا بكل شي
وباش مانصدقوش الخرافات والخزعبلات
اللي تيمرضونا بيها الناس المتخلفين
:Abu Ahmed (599):
2011-08-16, 04:29 AM
المواضيع المتشابهه للموضوع: قصة الجنية الى حكيت ليها في الحمام
العرض الشجري
الدرهم المغربي مقابل عملات الخليج