زعطه مغربيه لا كانت على البال والا على الخاطر ,, وحضور زواج مغربي

المشاركة الأصلية كتبت بواسطة ارسنال

سلام عليكم اعتذر على التاخير واكمل لكم هذا الجزء حضور الزواج
طبعا الزواج في مدينه صغيره اسمها بوزنيقه تبعد عن كازا مسافة ساعه حركنا

من كازا بعد مالبست الثوب وتكشخت واخذت الشماغ والعقال وعلقتهم بالسياره وحركنا ووصلنا 7 يمكن

طبعا الثوب والشماغ ماخذه معي من السعوديه اصلا عشان اذا رجعت دبي البسه هناك اذا احتجته بس

ماكان في النيه اصلا اني البسه في زواج وفي المغرب المهم اني كل شوي اتصل وصلت الأغراض لا

ماوصلت ماوصلت ماوصلت ,, الشكوى لله مسكنا الطريق وجلست اسولف انا والعم زكريا الرجال قعد

يسولف لي ويسالني وكل شوي يعبر عن حبه لنا طبعا انا كل ماقال احبكم يكبر راسي تجيني وطنيه

فظيعه لدرجة اني قلت يابوي شغل يا سلامي عليكم يالسعوديه خلنا ناخذ لنا بروفة تنكس قبل الزواج

قال وش هاذي قلت اغنيه سعوديه وطنيه اذا صرت تحبنا شغلها

بيزيد حبك لنا اذا صرت تبي ترقص عليها تاخذ الشماغ واخذ الشماغ وتسوي كذا واتلطم بعدين تميل

العقال كذا بعدين عطها يابوي هو مستغرب ويضحك هههههههههه واخا واخا

المهم وع اللوكيشن نمشي ووصلنا على المغرب تقريبا المهم ونمشي ونوصل على المكان الي ارسلهه

لنا وصلنا حي كذا راقي صراحه ومافيه اي شيء يدل لك على انه في زواج او فرح او شيء من هالقبيل

طبعا انا استغربت ياولد وش السالفه كلمت السواق قلت انزل اسال في هالبنشر شف وش السالفه ولا

احد يدري عني نزل السواق واراسل مروان كيفك ياصديقي على الواتس اب مارد علي ,, جاء السواق

قال ايه يعرفه وزواجه بكره ماهو اليوم طبعا انا تحطمت وانصدمت واراسله واتساب مايرد اخذت جوال

السواق واتصلت برقمه وقلت كلمه وقوله انه فيه سعودي معطيني رقمك عشان اتصل عليك واعطيك

اغراض هو مرسلها لك عشان زواجك واساله متى زواجه المهم يتصل مارد ويتصل مارد ويتصل مارد

المهم سالت البنشري وين بيته وصفنا ببيته ونروح للبيت مافيه اي شيء يدل لك على انه في فرح او

زواج المهم تحطمت انا كل هالمشوار والتعب واخر شيء كذا قلت اقول مشينا بس نتعشى

في اقرب مطعم تعشينا وجلسنا ونتصل ع الاخ مايرد ونرجع للبنشر حصلناه قفل نبي نسال له

رقم ثاني او لا المهم قلت خلنا نلف شوي نشوف احد يعرفه حصلنا قروب شباب كذا طلعو يعرفونه قالو

زواجه غدا ماهو اليوم انا اقول ياحسافة بس هالكشخه وهالمشوار المشكله الحيوان مايرد قلت اقول

العالم كلها تقول بكره خلنا نرجع كازا معنا منها يرد ولعل وعسى توصل الاغراض وبكره بنرجع

هنا قال واخا رجعنا وحنا في الطريق الي ويرد علي واتس اب سحبت عليه

وقلت للسواق اتصل اتصل ورد وقاله السواق انه انا مرسولك من شخص سعودي قال زواجي غدا واذا

تبغى تسلمني الاغراض انا اجي اخذها منك الحين مادري وش قال السواق لا بكره اوصلها لك قال

اوكيه وارجع اراسله طبعا انا ودي العن خامسه بس مابي اخرب المفاجاه قلت له اني ارسلت لك اغراض

هدايا وبرسلك شخص قال ايه دق علي قلت دقو لحيك وراك ماترد بعدين متى زواجك

قال غدا قلت طيب انت تقول انه اليوم يانصاب قال اه اليوم النساء قلت كيف يعني قال الحناء

يوم خاص بالنساء قلت له وانت بكره يحتفلون فيك لحالك بعد قال لا بكره خلاص نحتفل مع

بعض قلت طيب ارسل اللوكيشين لافقع وجهك مقر الزواج ماهو بيتك قال الزواج في البيت قلت ارسل

الموقع ارسله طلع يختلف عن الموقع السابق قلت الله يستر بس ورجعنا كازا وقلت عسى في الامر

خيره يمكن توصل الاغراض سالت السواق قلت وش سالفة الزواجات قالهذا يوم الحناء الزواجات في

المغرب اربعه ايام بالعاده يكون اليوم الثاني وقلت وزواج الاخ او الدخلهقال يتفقو ويكون بعد الحناء

واليوم الرابع قال هذا يوم المباركه يتجمعون الاهل ويباركون للعرسان قلت طيب انا يباركون له يوم

الزواج وانتهينا المهم انها طلعت السالفه مطوله كذا يعني طبعا تواصلت مع خويي الي تعرفت عليه

بالبلاك هاوس وعلمته بالسالفه وضحك قال تهجولت ياولد قلت خلها على الله بس قال تعالني بس

شقتي قلت ابي اريح والله ميت تعب قال مالك هم تعال بس المهم ارسلي الموقع و رحت له

المهم وانا في الطريق قلت شغلي ابو نوره ياعم زكريا قال منهو ابو نوره قلت هذا محمد عبده قال اه

فنان العرب ديال الملوك قلت ديال العالم كلهم شغلي بس

ياهناه وعذابه كيف تقسى عليه ,,, كيف طاوعك قلبك بالمشاعر تسلى ,, اه ياقلبي

انطربنا شوي ووصلنا كازا ورحت لصاحبي حصلته يشوي هو والي معه شافني ضحك قال وش عنده الثوب

والشماغ المهم ماقصر اكرمني وجلست معه سهرت المهم قلت خلاص بمشي عن اذنك قال والله ماتروح

نام عندي قلت بروح يارجال مايمديني ببدل ملابسي واشحن جوالاتي واسدد الفندق زودت يوم قال بكره

تجي تسكن معي عندي غرفه فاضيه قلت مانختلف واروح الفندق واعطيهم الثوب يغسلونه وانام

واصحى واتصل ع السواق هاه وصلت الاغراض قال لا انسدت نفسي وقفلت

نزلت ع الكورنيش اتمشى وتغديت وافطرت وجلست في تروبيكانا واناظر في العالم والناس ومتضايق

للامانه ويتواصل معي صاحبي قال وينك قلت في تروبيكانا قال نص ساعه واجيك قلت برجع الفندق انا

بلبس وبروح الزواج قال بجيك قلت طيب كويت الثوب والشماغ وكشخت جاني الرجال وقال اعطني

اغراضك وشنطتك وانت تيسر احضر الزواج وتعال للامانه ماكان في نيتي اني اطلع من الفندق

لاسباب باذكرها لاحقا المهم بعد اصراره علي والحاحه وافقت واخذ اغراضي وشنطتي اتصلت ع السواق

مسكنا الخط واتصل على السواق هاه وصلت قال لا قلت لا حول الله مسكنا الخط وتوكلنا ع الله اول

ماطلعنا من كازا ويتصل علي ويقول وصلت ,, قسم بالله صرخت صراخ فظيع من الفرحه السواق بغى

ينجلط وقف من الخوف قلت وصلت انبسط وفرح وقلت قابلني فيها الان بسرعه قال لسى اتصلو علي

دابا قلت روح خذها منهم ويروح ويستلمها قلت جايك وارجع له واروح له عند بيته قريب من ايكيا كازا

المهم رجعت واقابله واخذت الاغراض وسلمت عليه وعطيته اكراميه وقلت له شكرا من كل قلبي واذا

رجعت باتواصل معك وحسابك عسير وياويلك مني نشفت ريقي اخذت الاغراض وشيكت عليها طلعت

نفس ماطلبت بالظبط واهم شيء المشالح وبسم الله من الفرحه الي فيني كل شوي اناظر في الاغراض

وعلى بو زنيقه طبعا تاخرنا بسبب الرجعه شوي واخلي السواق يتصل ع مروان ومايرد اراسله واتس

مايرد طبعا عريس مالومه المهم وصلنا ورحنا ع اللوكيشين ومرينا من عند خوينا البنشري قلنا زواج

الرجال اليوم قال اه قلت له الحين تعرفه ولا تحضر وليتني ماقلته حسيت اني جرحته ضحك قال زواج

ديال العائله يوم قال هالكلمه والله اني خفت صراحة قلت فعلا لا يكون زواج بسيط ومختصر وانا بقط

وجهي بينهم المهم قلت زي ماتجي تجي مشينا بس المهم واروح ووصلت ع اللوكيشن وفعلا طلع

مقر الزواج في بيت كبير شوي يختلف عن البيت السابق وشغل مرتب صراحه فيه صاله واسعه كبيره

جدا المهم شفنا العالم سالنا قلنا هذا زواج مروان قالو ايوه قلت الحمد لله ارتحت صراحة

المهم سال السواق موجود هو قالو لسى ماجاء قلت حلو المهم جيت عند السواق قلت انزل اعرفهم

بي وقول لهم الشيخ فلان من السعوديه صاحب مراون جاء يحضر العرس دياله قال انت شيخ قلت ايه

ماني مالي عينك يعني قال لا قلت اجل وش قال واخا واخا

نزل قال جاكم الشيخ فلان صاحب مروان سعودي طبعا انا بالسياره معطيها وضعية ابو بندر جاء فتح لي

الباب ماقصر عرفتهم بنفسي قلت انا صاحبه سعودي وجاي من السعوديه

رحبو فيني صراحة وشافوني لابس سعودي قالو بس هذا الكنق وخرو عنه جاكم المسكت مرحبا بيك اهلا

وسهلا ومن هالكلام رحبو فيني وجو دخلوني وسحبو على السواق قلت هذا صاحبي يدخل معي ولو

هذا العم زكاريا قال الله يحفظك قلت امش بس ويضحك

دخلوه معي دخلنا البيت هذا طبعا البيت انا مادري منهو له هو بيت مروان او بيت اهل زوجته بس انه

بيت فخم جدا وكبير والصاله كبيره جدا وكلها طاولات والعالم جالسه دخلت طبعا انا ويمشون وراي

والسواق جنبي ويجلسوني على طاوله في المقدمه يعني وجلسونا محتفلين فيني صراحة علمتهم

قلت لا احد يعلم مروان اني جيت المهم جابو لنا حلويات وجابو لنا اتاي وعصير ومكسرات ومن هالقبيل

يعني طبعا فيه كم وحده كذا معها طبل تطبل عليه وفيه فرقه جالسه اورق وكمنجه وطبل

والصاله كانت مليانه تقريبا والكل يبتسم في وجهي يناظرون وش هالكائن الفضائي الي جالس بينا

مستغربين من شكلي ويجون يسلمون علي الاطفال والبزارين اشغلوني صراحة وردة فعلهم مضحكه

وبريئه يناظرون فيني يخافون ومره يضحكون المهم انه العالم كلها عيونهم فيني

شوي ويجي العريس طبعا علموه قالو فيه سعودي جاء يقول انه صاحبك هو انصدم

دخل بسرعه وشافني بغى ينجلط هههههههه ويصيح ويجي يحضني بقوه ويسلم علي ويشدني

سلمت عليه ويرجع يشدني مره ثانيه المهم قلت ياخوي خلاص فارقني خربت ام الترسيمه ماني بزوجتك

ترى ويضحك ويرجع يشدني ويسلم علي وعلى راسي وعلى يدي اول مره في حياتي واحد يسلم على

يدي ماصدق وقلت له تقولي زواجك امس ياحيوان ترى جيت امس اعتذر لي وجلس معي وقال ماعليش

وباركت له وسولف معه طبعا هو مو مصدق كل شوي ينظار فيني ويضمني اشغلنا قلت المهم وين

عروستك يابوي قال شوي وتجي سولفت معه وشربنا عصير طبعا قلبي ماهو معه للامانه ولا اني بيمه

من شيء جالس اشوفه قسم بالله شيء يبكي بس الشكوى لله المهم وادقه بيدي قلت لو اني الحين

داق البشت الحين وجالس جنب عروستي وحده من هالمزيونات الي يفتحون النفس في الصاله واقابل

عروستي مو ازين لي من مقابلة وجهك ويضحك قال اختر اي وحده هنا وانا اخطبها لك قلت اصلا انا

مادري كيف موافقه عليك انت وراسك المربع ذا قال الحبيبه ديالي قلت بالله طلعت متزوج عن حب قال

اه قلت الله يعينها بس هههههههه قال اختر وحده واخطبها لك

قلت والله ابيهم كلهم ضحك بس والله ياجماعة الخير شيء غير طبيعي صراحه جمال رباني المهم

جاني اخوه وسلم علي وامه واخته وزوج اخته ابوه ميت الله يرحمه وجاني عمه ابو زوجته وامها

وصلت عروسته قال عن اذنك قلت افا يالرخمه تخليني وتروح لها وانا جاي عشانك يامروان

ضحك قلت روح روح بس وراح طبعا دخلت ويصارخون كذا ووركبت على زي الهودج كذا ويشيلونها اربعه

فوق اكتافهم وجلسو يدورون فيها ويهزونها بالصاله وهو يمشي قدامهم وهذولي يغنون ويطبلون

يعني العالم مبسوطه ومستانسه وللامانه اني انبسطت وعيوني اه ياعيوني بس كل مارد عيني يمين

اقول وش هالزين اردها يسار يارب رحمتك اناظر جنبي احصل العم زكريا المهم اني ماني بعقلي من

شيء شفته طبعا العالم تشوفني مستغربه سعودي طبعا انا معطيها مره وضعية ابو بندر مره وضعية

الكوبرا يابوي ومسبحه وكل شوي واحد يجي يسلم علي المهم تنشب لي عجوز وتتمسح فيني وتقول

انتو ديال مكه وديال النبي محمد ومادري وش قلت اي نعم انا من ابناء مكه الله يعزها مادرت اني من

حقين الروضه في الرياض وتلمسني وتمسحني وتجي تسلم علي كذا خدادي والله اني استحيت الصدق

وجتني وحده قالت تبغى نزوجك مع صاحبك قلت والله ياليت قالت ازوجك بنتي قلت اتشرف فيكم

ياخالتي وتاشر على بنتها ,, بسم الله ماشاء الله تبارك الله قمر قمر قمر بس باقي صغيره قلت

ياخالتي متزوج امزح معك وانا نصاب ولا انا متزوج ولا شيء

طبعا فيه طاوله يعني بعيده عن شوي عليها 3 فتيات يناظروني واناظرهم يناظروني واناظرهم مره

يناظرون مره اناظر شيء صراحة لا يعلى عليه المهم جاء هذا يغني ماسك المايك ويجيون يرقصون

قدامي انا معطيها وضعية الثقل ويجي ذا الي يغني ويرحب فيني وحي الله اهل السعوديه ويرفع

فيني ويمسكني بيدي ويقومني غصب ونرقص ويحطني وسط هالمزيونات انا شغال اناقز بينهم

ماعرف ارقص على اغانيهم المهم تجي وحده من هالثلاث تقول هذا سعودي ماثمش راشد الماجد

وزلزله تقولها بلهجه سعوديه قلت زلزله اجل ههههههه بس مخاويه ربعنا ذي المهم جاء سحبني ذا

الي يغني وحطني مع مروان ونرقص انا وهو وزوجته وجو شالوني ثلاله على ظهورهم

وشالوه بعد هو هزونا شوي وطار البرستيج والحق الشماغ ولا امسك العقال حوسه نزلونا رقصنا شوي

ورجعت جلست والناس تضحك علي المهم جلست وتجي الثانيه وتروح عند المطرب تعطيه فلوس

وتقول السعودي يبغى شيلات وتشغل شيله مرحبا مليون والنور فلاج الظلام من جوالها وتحطه عند

المايك فجاه والي في القاعه كلهم يقومون يرقصون المشكله اني اكره الشيلات ويجون يسحبوني مره

ثانيه المهم عطيتها تنكس شوي وارجع اجلس بس كان الاداء افضل من المره السابقه بس الصوت لك

عليه لانه من من الجوال للمايك المهم جاء جلس العريس هو وعروسته في زي الكوشه كذا والعالم

تجي تسلم عليهم وتبارك واناظر في السواق قلت قم يالذيب هات الهدايا وجابها ماقصر ,, واجي قلت

هاذي الساعه لك وهذا الطقم لعروستك طقم الذهب الي شريت والله اني خفت يكون صغير عليها

بس طلع مقاس وهذا طقم عود وبخور لك وهذا لزوجتك واعطي زوجته وعاد هاذي عجوه من المدينه

اذا صحيت الصباح تاكل منه عشان تبقى طول عمرك سعيد واذا تبي نصحيحتي لو تاكل منها قبل تنام

يكون افضل ضحك وقام يحضني ويسلم علي واقوله ياخي احضن الي جنبك كسرتني يابن الحلال

باقي البشوت والمشالح ,, قلت هذا بشت وافكه والبسه يعني طلع شوي كبير عليه بس يعني الدعوه

فرحه والبس البشت الثاني واتصور معه بعدين لبست زوجته البشت الي كان علي وتصورت معهم

وقطيت وجهي بينهم وتصور معهم المهم ويجي واحد شايب كذا يتلقف من ورى وياخذ الهدايا

ويفكها واناظر فيه واقول بيني وبين نفسي افتكو لحيه وش يبي ذا

المهم فكها ولبسه الساعه ويخليه يلبس زوجته الطقم المهم طلع ممتاز عليها رحت جلست وجاء

السواق جنبي طبعا العالم ترقص كل شوي واحد يرقص والعالم ترقص وتغني والله ياجماعة الخير

السواق يسولف لي وانا مفهي المهم ع الطاولات العالم جالسين جابو العشاء حطوه عليه

بسطيله واكل مغربي طبعا انضم العريس وعروسته لي ع الطاوله اكلت كم لقمه حفاظا ع البرستيج

قلت ياخوي مافيه سامري ضحك المهم قلت الحين انا مادري كيف وافقت عليك هاذي انت وراسك المربع

ذا طبعا ماشاء الله تبارك الله عموما جلست شوي كذا واناظر وقلبي يوجعني والله طبعا كل هذا

الاحداث الي صارت لي في الزواج والي عايشته

طبعا عندهم بوسط الزواج تطلع العروسه تغير وترجع يمكن مره او مرتين ويشيلونها بعد مره ثانيه

ويغنون ويرقصون والعريس بعد يغير ويلبس جلابيه للامانه كان زواج ممتع وانبسطت وتعرفت على

ثقافة بلد ثاني وايضا قلبي وجعني والله من شيء شفته المهم اني جيت عنده وودعته قلت نشوفك

ياوحش ع خير المهم ويبكي ويضمني واضمه واسلم عليه قلت ياولد عيب عليك تشوفك

زوجتك تبكي في يوم فرحك خلاص ويرجع يبكي ويضمني ويشدني مره ثانيه ويقول انت صديق وفي

قلت الوفاء لاهل الوفاء ياخلفهم تبي شيء بمشي انا خلاص ودعته المهم وزوجته جنبه وتبكي بعد

هي ,, وانا اناظر يالليل وش اسوي الحين جاي افرح معكم انا ولا ابكيكم

جلست كذا شوي حتى مسح دموعه الاخ ويرجع يسلم علي ويضمني ,, المشكله مايعرف يضم يشدك

يكسر ظهرك قلت ياخوي كسرتني ترى ماني بدنابل او اوزان حديد بصالة حديد عندك تقعد تشدني كذا

وفعلا مايعرف يضم الله يعينها عليه ويضحك يوم ضحك ارتحت ودعته وسلمت عليهم كلهم من والى

كل الي في القاعه سلمت عليهم حتى البزارين سلمت على اكبر عدد ممكن شيخ لازم

المهم مشيت ويلحقوني العالم يودعون الشيخ واركب السياره وعلى كازا واسولف للعم زكاريا قال والله

زواج مزيان والعائله راقيه من طبقه مخمليه قلت ايه قال وماشاء الله عليك تعرف ترقص قلت الله

يطمنك ويجبر بخاطرك طمنتني واتصل على خويي قلت ياولد انا جاي قال تعشيت قلت عشاء لك عليه

قال بننتظرك تعال بس المهم رحت ووصلت كازا

ووصلني السواق وقلت شكرا بالزاف بتصل عليك في وقت لا حق

حاولت اني اذكر كل شيء مهم فيه بالتفصيل وعشان تعيشون الحدث ونكمل لكم بقية الرحله في الجزء القادم واذا تذكرت بعد شيء وماكتبته برجع اكتبه وتحملوني واعتذر على الإطاله