زعطه مغربيه لا كانت على البال والا على الخاطر ,, وحضور زواج مغربي

حياكم الله جميعا كمية السعاده الي تغمرني الان لا توصف وانا اقرا ردودكم وتفاعلكم معي
فديتكم كلكم لا خلا ولا عدم الله يسعدكم غمرتوني بلطفكم الله يحفظكم ان شاء الله

المهم اكمل لكم رجعت من الزواج

واستقريت عند صاحبي الجديد هذا في شقته شقه نظيفه وجمميله وواسعه وممتازه جدا جيت عنده

قلت ياولد تعرف تطق الظهر قال ليش قلت ياولد ظهري مكسر من امس رايح جاي والعريس كل شوي

يحضني كسر ظهري قال طيب يحظنك هذا شيء جيد قلت له ياخي هذا مايعرف يحضن يشد يدك مع

جسمك كامل ويحضنك ويميل عليك هذا اغتصاب مو حضن ويضحك قال اوكي طق ظهري ماقصر

تعشينا وريحت شوي وبعد ماهدا الصخب الي كانو فيه مسكته على جنب سولفت له وسولف لي

وعطاني سالفته كامله قال لي انا في المغرب 18 يوم

كنت بالرباط الان ولي في كازا خمسه ايام وانا رجال احب الوحده بس والله اني طفشت وشفتك وعجبني

جوك وابي اخوتك قلت الله يحيك ونتشرف فيك سالني وش مخططي قلت ماعندي لا مخطط ولا وحده

ولا ثنتين رحلتي بعد سته ايام من الان قال ممتاز جدا

وعطيته سالفتي من والى وقال جاي المغرب بس عشان تحضر الزواج قلت بس قال ياخي انت فاضي

قلت مسكت في راسي الا احضر زواج
صاحبي قال وماخططت لاي شيء ابدا قلت ابدا وخليتها كذا زي ماتجي تجي

قال ياسلام سلم حلو وش الوضع الحين قلت الي ودك وللامانه كنت ابي اجلس في كازا انا ابي اتعرف

عليها واجلس فيها واتمشى فيها واحتك بناسها لاني زرت مراكش قبل كذا مرتين واعرفها وزرت طنجه

فكنت حاب اجلس بكازا قال انا ودي ننزل مراكش لاني خمسه ايام هنا وطفشت لفيتها براسي ماعندي

شيء قلت مراكش مراكش بس بشرط قطه تدفع نص درهم اقط لك فيه

وبحاسبك على الليله الي جلست معك فيها هنا وبحاسب معك في السياره طبعا رفض احاسب في

الشقه والسياره والقطه قال مانختلف قلت اوكيه كذا متفقين

نمنا وصحينا وحصلت الشغاله مزينه الفطور افطرنا وروقنا طبعا وحنا جالسين ع الفطور ونسمع صراخ

وصياح ومناحه بالدرج فكينا الباب نشوف وش السالفه ثنتين يصارخون ويبكون ويسبون ويشتمون

يالله صباح خير وش السالفه طبعا الشقه الي تحتنا فيها كويتين وهذولي كانو عندهم وواحد منهم

معتدي ع وحده ضربها مادري وش صار بينهم صقعها طلع الدم من خشمها وهاك سب وشتم وننزل

نشوف وش الوضع وحده جالسه خشمها ينزف وتصيح والثانيه تبكي جنبها والاخ الكويتي شغال سب

وشتم فيهم طبعا هو عملاق كبره كبر الثور مايدخل مع الباب نزلت انا وصاحبي نبغى نهدي الوضع راح

صاحبي للكويتي يهديه ويمسكه واجي انا عند البنت الي خشمها وفمها ينزف ابي اهديها واساعدها

وتتفل بوجهي الله يكرمكم وتصارخ علي عاد انا حقدت صراحة وكان ودي اكمل على وجهها بس سكت

مراعاة لوجهه المفقع و لانها تحسبني خويه المهم ناديت الشغاله قلت جيبي

مناديل ومناشف ومويه وجالس اسكت في الثانيه المشكله اسكت في هاذي تصيح هاذي والله البلشه

صدق وصاحبي يهدي في الثور الكويتي ماهو راضي اخر شيء دخله الشقه ودخل معه وقفل الباب

وتجي الشغاله تمسحها وتغسلها قلت اقول دخليها الشقه عندنا وجهه رايح فيها ذي هم يحسبون

اني صاحبه وتقنعهم الشغاله دخلتها وخليتها تنسدح بالصاله وامسك منشفه واقفل خشمها وفمها

سديته عشان اوقف النزيف المشكله صاحبتها اشغلتا وصجتنا بالصراخ والصياح والبكاء اسكتي ماهي

راضيه تسكت انطمي ماهي راضيه شغاله سب وشتم وتتوعد وجاء صاحبي ويشوف الوضع قال ياخي

هذا ماهو بني ادم ماهو بصاحي ذا قلت وش السالفه علمني طلع موضوع تافه جدا صراحة اني احتقرته

شيء مايستاهل المهم انها قلبت تحدي بينهم وعناد وعاد يبدو لي انهم استفزوه وجلدهم الثنتين

طبعا صاحبتها تبكي واجي عندها اقوله الحين هاذي وجهه مفقع وساكته وانتي ماجاك شيء وازعجتينا

اسكتي دخلت غسلت هديناهم شوي جلسنا يمكن ساعتين اخرونا والله والنزيف

ماهو راضي يوقف واتصل على العم زكريا وينك ياخلفهم قال بعيد قلت تعال الحين قال بتاخر قلت

بسرعه 10 دقايق وهو عندي قلت وين البعيد ؟ وش هالسرعه المهم ويجي علمته بالسالفه

طبعا قال سعودي الي مسوي كذا قلت لا كويتي قال وحق الله العظيم اني ماحبهم قلت ياخي ماهو

وقتك توزع مشاعر الحب والكره

هاذي نبيك تتصرف معها خليت الشغاله والعم زكريا معهم ونزلت عند الكويتي انا وصاحبي

طبعا هو عملاق واكتشفت ان فيه ثور ثاني نايم بغرفه بالداخل مطينها للاخر وماهو داري وش صاير

المهم واقفين عند الباب وقلنا ترى غلط ومايصير ومن هالكلام ومادري وش ومالك داعي وبامكانهم

يجيبون لك شرطه يجرونك هنا ولا يجيبون لك ناس يجلدونك حتى تعض الارض هنا قال يخسون مادري وش

ويسبهم قال الحين شنو تبون وش حقه نازلين لي الحين قلنا نبي نعلمك ان مالك داعي ونبي نحل الامر

بشكل ودي عشان لا يكبر تعال معنا اعتذر لهم واكرمهم تراك مفقع وجه وحده منهم قال تستاهل

المهم ان هالثور ماهو راضي يكابر جبناه يمين يسار ماهو راضي المهم قلت لخويي امش ذا رخمه

مايسوى التاليه سحبنا عليه ومشينا حصلناهم ريحو وسكتو جاء صاحبي قال لهم السواق بيوديكم

الحين مستشفى وان شاء الله مايقصر معكم

ويجي يعطي كل وحده منهم الف درهم وتجي الثانيه ترمي الفلوس وتسبنا وتسب الكويتي

هاذي كرامتنا وهو ضربنا واهانا وبناخذ حقنا منه اخذت الفلوس انا واهدي فيها

وقلت هاذي اذا احتجتو شيء بس علاج او شيء رفضت جيت عند السواق والشغاله قلت تفاهمو مع ذي

لاكمل على وجهه هي بعد

انا المشكله والله العظيم مابي شيء ولا لي اي مصلحه ولا اي فايده اصلا بالعكس تاخرنا وخويي دافع

فلوس من جيبه لهم والسالفه كلها رحمة بهم وشفقه لا اكثر ولا اقل ولا بامكانا نسحب ونمشي ولا

همونا بس الموقف يحتم علينا نتصرف اقنعهم السواق وعطيته الفلوس وقلت عطهم وخذ هاذي لك

المهم ودعته وسلمت عليه يمكن ماعاد اشوفك بنزل مراكش

سلمت عليه وودعته اخذهم ومشى وهم نازلين باب شقة الكويتي مفتوح وتدخل هاذي تسبه وتتكلم

عليه وتهدده وتوعد فيه

ويطلع عليها وتهرب هههههه ويجي العم زكريا يمسكه وياخذهم ويمشي

واخذنا اغراضنا وشنطنا والعزبه ومرينا الكويتي قلنا ترى سوينا كذا وكذا مو عشانك ترى بس عشان

وضعهم كان مزري ولا قسم بالله ودي يلعنون خامسك ويجرجرونك انت مجرد زلابه لا اكثر ولا اقل قال

انقلع بس ياخروف انت وياه يالله مناك بس

قال خروف ولا ماقاله وارجع عليه قسم بالله نيتي شر ويمسكني صاحبي قال يارجال امش بس ماعليك
فيه ركبت وهديت ويهدي فيني ويقول تعوذ من الشيطان ياولد

وطلبت قهوه روقت وافكر بيني وبين نفسي واقول لصاحبي كويس انك مسكتني ياولد قال ليش

كنت بتجلده يعني قلت لا والله وجهي بيصير زي وجه البنت الي قبل شوي هههههههه ويضحك

المهم مسكنا الخط وعلى مراكش طبعا هاذي احداث يوم واحد بس واكملكم بقية الرحله في الجزء
القادم وباختصار ان شاء الله

تحياتي لكم ياجمل ناس انتو واعذروني طولتها وهي قصيره بس الرحله مليئه بالاحداث والاكشن

تصرف انساني منك ومن صاحبك تشكر عليه
انا لو مكانك وعندي سفر ما لي علاقه يتفاهمون بينهم دامهم برا الشقه وانتهت هوشتهم

بدا الأكشن وأحلوت الرحلة وفِي مراكش أكيد اكثر

من أجمل التقارير العفويه واسلوب راقي وشهامه ترفع الراس بموقف نبيل ..يحق لنا ان نفخر بك عزيزي
تحياتي لك وللجميع

برضو متابع.....


للعلم ارسنال لو كنت مكانك مارحت للشباب إلي اعتدوا على البنات بغض النظر عن الجنسيه.... لسبب واحد..

من يستقوي على امرأه ويفرد عضلاته عليها لايحمل ذره من رجوله... والكلام معاه خساره اصلا ومضيعه للوقت... كان عنده كثير من الحلول أقلها يمشيهم ويعيش جوه موب يمارس التصرفات البهيميه.

__________________

الحياة ليست عدو لنا بل صديق مشاكس

سرد جميل يخلينا نعيشو معك الاحداث، احسن انك ما تدخلت فشجار مع هداك الثور، انت بس صاحبك ضمك كسر ظهرك كيف لو ضربك هداك هههه

أبو فالح ,,الجنتل ,, اديب ,, رايق ,, مالي شبيه ,, حمود الخامس عشر ,, Mohd Alhmod
مزاجيه .. شبيه صويحبي ,, سلاويه الخاطر ,, شموخ كازا ,, بنت البلاد ,, الينبعي
مراكشيه ,, علول ,, roomail ,, حسانين ,, كاسبر ,, mimi ,, بيضاوي ,, fdrel
,, ابو مبارك ,, aminkhalid ,, هوازني
^^^^^^^^^^^^^^^^^^^^^^^^^^^^^
كل بإسمه أسعدتوني بمروركم وتفاعلكم وغمرتوني بلطفكم الله يسعدكم ويبارك فيكم يارب
واتمنى اني مانسيت احد فديتكم

المهم بكملكم ياصدقائي

المهم تيسرنا ومسكنا الخط وعلى مراكش وقفنا بالاداء عبينا بترول واخذنا بعض الاغراض وتوكلنا

طبعا اسولف لصاحبي واقوله يابو بدر قال سم قلت والله العظيم مغبون قال افا ليش

قلت ياخي تبي الجد قال ايه قلت احس بإهانه عظيمه حسيت اني نزلت نفسي واسترخصت نفسي

قال ليش لا عاش من يهينك قلت ياخي الثور الي في الصباح ذا قهرني وغبني قهرني قهر فظيع

كان ودي انا ماتدخلنا قال بس هذا الي قاهرك قلت ايه انغبنت نطلبه ويسبنا ويتكلم علينا

ويقول يالخرفان ويضحك صاحبي وهذولي جبناهم الشقه وانت عطيتهم فلوس عشان يتصرفون اذا

احتاجو شيء ويرمونها وانا عارف انك معطيهم كمساعده لا اكثر ولا اقل وانت مقصدك خير قال ياخوي

انت قلتها خير واعتبرها دفعة شر عنا والله يكتب الاجر ولا تنقهر وتندم على فعل خير

ولا تلومها يوم ترمي الفلوس ردة فعلها طبيعيه ووقت زعل وغضب وهم حسبو انا اخوياه فعادي جدا

وفيه مواقف صارت اقوى من كذا لو اعلمك يشيب راسك قلت لا تعلمني انسدت نفسي من هالصباح
الله يسد انفسهم قال بسيطه يارجل هون على نفسك الوضع كان صعب ولازم نتدخل سكت وانا مغبون

المهم كملنا الطريق واساله السكن في مراكش وين قال نوصل وبتشوفه قلت طيب وش الجدول وش

النظام قال انت وين تسكن اذا رحت مراكش قلت له في الروز قال لا مايصلح السكن هذا احسن قلت

يالله مابقول شيء معك وصلنا مراكش وقفنا شرطي قبل مراكش كنا مسرعين شوي كان طيب وحبيب

للامانه وفكنا وكملنا طبعا السكن في مراكش عباره عن شقه ثلاث غرف وصالتين وحده كبيره وحده

صغيره مستاجرينها من المالك مباشره يعرفه ابو بدر واتصل على الشغاله الي يتعامل معها وتجي

انسانه جدا جدا طيبه ومحترمه الشقه جمميله جدا ونظيفه بس فاضيه اغراض مطبخ مافيه مفارش

مخدات مافيه تلفزيون مافيه هو استغرب حتى بس قال ياولد غريبه اغراض المطبخ بالعاده تكون

موجوده والتلفزيون يكون موجود وش رايك قلت كلمه وتشوف كلمه قال ايه مافيه شيء التلفزيون

انكسر واغراض المطبخ شلناها قلت عادي مفارش نشتري واغراض المطبخ بسيطه نشتريها والعزبه معنا

او الشغاله تجيبها التلفزيون ماني بحوله ولا بناظر فيه كانه اقتنع قال مو مشكله المهم الشغاله

وعلمناها بالسيستم والجدول نزلنا المرجان شرينا كل شيء والاغراض مرينا اخذنا لحم ودجاج وعطينا

الشغاله قلنا احنا طالعين وبنرجع الساعه 9 نبي العشاء جاهز

قالت واخا طلعنا حجزنا بالكاي وبعدها ع ساحة الفناء تمشينا شوي وغثونا هالشحاذين شوي ورجعنا

تعشينا ورحنا سهرنا وكملنا بالشقه ,,
طبعا باختصار يعني لاني طولتها وهي قصيره مراكش كانت عباره عن سهر بالكثير الى الساعه 7 الصباح
وبعدها نوم صاحبي حده سبعه وينام ونطلع نتمشى من بعد الظهر نروح سوق نروح الفناء نروح اي

مكان ونرجع على قبل العشاء نتعشى ونريح شوي ونروح نسهر

نروح نتكي بمقهى نختلط بالناس رحنا منطقة اوريكا وتمشينا وانبسطنا وزينا قهوه وتمر وظبطنا

الكبسه وعلوم زينه وكانت رحله جمميله جدا كل يوم نروح مكان وكل يوم نسهر طبعا سهرنا بدبليو 3

مرات وبالكاي مرتين استمتعت جدا جدا جدا وصاحبي كان ونعم الرجل اكبر مني في السن ولكن جوه بطل

ورجال رزين وتشرفت بمعرفته والرجال مزعوط قديم من المزاعيط القداماء له يمكن فوق الـ 12 سنه وهو

رايح جاي طبعا بالنسبه للسهر ,, كنا ناخذ طاوله شخصين فقط حجزنا بالدابليو بس صراحة انه غالي

واسعاره مبالغ فيها جدا صح ان جوه بطل بس بصفه عامه يعيبه الاسعار ومع ذلك مليان الكاي خير جيد

ولا باس وارخص طبعا في اليوم الثاني قالي صاحبي انا عازمك قلت وين قال فيه مكان جديد بعزمك

فيه ماتعرفه قلت لا ياحبيبي عزايم مافيه قال مو شغلك اليوم عزيمتك علي طبعا وش السالفه في

مطعم جديد في مراكش اسمه ملاك زمرد مكانه فوق ديسكو الـ w مباشرة جدا جدا جدا جدا راقي وفخم

وفيه عروض حيه وفيه طرب وفيه اغاني شغل خطير وبالحجز طبعا اتوقع انه تبع الـ w

صاحبي يتصل عليهم من اول يبي يحجز طاوله مايحصل لانهم كانو جايبين دنيا بطمه وكم فنان كذا وفرق

تغني فما كان يحصل طبعا المهم انه حجز ابو بدر طاوله قريبه من البيست قال عاد الله الله بالكشخه

قلت ولا يهمك بس وش السالفه قال مو شغلك تكشخ واعلمك كشخنا ومشينا ودخلنا استقبلتنا

الويتريس وقالت عندكم حجز قلنا فيه قالو تفضلو تفضلنا وجلسنا صراحة شيء جمميل وشغل متعوب عليه

وناس وعالم بدات العروض الحيه تبعهم هاذي كان فيه ذاك اليوم عروض لاتينيه ورقص لاتيني الي هو

السيلسا استمتعنا صراحة المهم صاحبي شاف له سيده كذا كبيره شوي

وعزمها ع نفس طاولاتنا جات بس رفض واحد هناك يعطينا كرسي زياده كلمني قال دبر لنا كرسي عاد

انحشرت اناقلت اوكيه جلسها مكاني وانا باجيب كرسي رحت للبنت الي استقبلتنا

اول شيء كلمتها بطريقه وديه قلت كرسي ممكن قالت ممكن وتعطينا ماقصرت المهم كملت جلسه

معهم واستانسنا وانبسطنا طبعا ايضا عندنا حجز في دبيلو بنفس الليله والمشكله انا حجازين مقعدين

واكلم صاحبي قلت هاذي بتجي معنا قال ايه اكيد قلت طيب سكت و نزلت رحت لعماد ماعطاني وجه

قال عامره قلت ياخي عندي طاوله بس ابي مقعد زياده قال اوكيه موظف الحجز عند مين قلت وحده

مادري وش اسمها طلعو اسمي وزودت مقعد ودفعت وكملنا بالدابليو وبعد خمسه ايام في مراكش

كانت ممتعه جدا برفقة ابو بدر حان وقت الرحيل

ابو بدر باقي مطول بمراكش وكان لازم ارجع وحلف انه يوصلني للمطار ورفضت رفضا قاطعا قلت بتصرف

ماعليك كلمت العم زكريا وقلت تقدر تجي مراكش تاخذني قال لا والله ماقدر قلت حاول تدبرني

قال ماعرف احد والله قلت طيب كلمت السواق الثاني قلت تعالني مراكش عندي رحله جاء اخذني

طبعا ودعت ابو بدر والله العظيم ياجماعه انه احرجني يدفع ويرفض اني ادفع لدرجة انا نقلبها هواش

طبعا قبل امشي رحت الغرفه وحطيت تحت المفرش مبلغ لاني عارف لو عطيته مابياخذه
وحركت من مراكش بعد السهره الاخيره مباشرة وبعد ماودعت ابو بدر كان ونعم الرجل شخص من ذهب

ورزين وعاقل وكبير في السن والكلمه عنده بثمنها ومكسب كبير اني عرفته
حركت تقريبا على الساعه 6 الصبح ركبت السياره وربطت الحزام واراسله واتس اب استودعك الله

فيه مبلغ تحت المفرش خذه لا تنساه وقفلت جوالي حصلت له كم رساله قلت انت ماقصرت معي خذ

الفلوس بس واعذرني بعد على قلها

ونومه ياحبيبي وصلت المطار على الساعه 10 تقريبا وصلت ودخلت وكالعاده تفتيش و وصلت للكاونتر

لسى مافتحو تسجيل الرحله انتظرت شوي ميت تعب وابي انام فكت الرحله وشحنت شنطتي وعلى

الجمارك جيت على الجمارك طبعا معي مبلغ بسيط ومعي طقم الذهب الي شريته لامي جاء حق الجمارك

عندي سالني قال معك فلوس قلت مبلغ بسيط كم قلت يمكن 400 درهم بس قال اشوف فتحت

الشنطه وشاف المبلغ طبعا شاف الذهب قال وش هذا قلت هديه قال وش هو قلت ذهب قال طلعه

ويطلعه قال هذا اخذته من وين قلت شريته من السوق بكازا قال وش يثبت انك شريته قلت عندي فواتير

واطلع الفاتوره جاء سوبر فايزر عندهم ناظر فيني ناظر في الفواتير قال بالسلامه والله اني كنت خايف

الصدق بس عدت على خير وبعدها جوازات وع الصاله انتظر بس متى اركب ميت تعب ركبت ولا ماركبت

ولا حسيت بنفسي ونومه ياحبيبي ماصحيت الا قبل الهبوط بساعه وصلت دبي وسجلت دخول ,, وعلى

ميديا روتانا وديني ونومه ياحبيبي لصلاة الظهر صحيت وع الامارات مول صلحت شاشة جوال الايفون

انكسرت وتغديت وشفت لي فيلم بالسينما وتسوقت ,, ورجعت الفندق اخذت اغراضي وع المطار

وصلنا الرياض بعد كل هالهجوله والتعب كانت رحله ممتعه مليئه بالاثاره وتعرفت على ناس طيبين

وتعرفت على اهل المغرب الكرام عن قرب اكثر واكثر
,, طبعا هاذي رحلتي سردت لكم كل مافيها طبعا الاحداث كثيره وحبيت اغطي لكم كافة الجوانب عشان
تكونو في الصوره وتعيشون الحدث أدري انه كان طويل بس املي
انه ماكان تقرير او موضوع ممل او السرد الي فيه كان ركيك واتمنى انكم استمتعو وانتم تقراونه
وكان تقرير خفيف عليكم مع كامل ودي واحترامي لكم جميعا
بالتوفيق وتحياتي لكم

عفيك عليك تقرير مشرف وشهامة نتعلم منها الچثير ومازلنا نتابع بفخر