حكايهـ عشق .. تقرير واقعي ( مواقف غريبه)

(( الجزء السابع))
(( فاس العز والفخامهـ))
[IMG]‏[/IMG]
صحيت من النوم أتصلت على السواق يجيني و بعدها أخذت دش ولبست ورحت عند الاستقبال أمدد ليله ثانيه بنفس السعر 400 درهم طلعت من الفندق وكانت الاجواء ممطره وجميله
[IMG]‏[/IMG]
ركبت السياره جوله بسيطه و كان فينا جوع أخترنا مكان و طلبنا فطور وجلسنا فيه حدود الساعه
[IMG]‏[/IMG]
ورحنا المدينه القديمه نتجول فيها
[IMG]‏[/IMG]
وهو عباره عن سوق يبيعوا فيه ملابس والحرف والشغلات اليدويه سوق كبير فيه اشياء متنوعه و كثيره والتمشيه فيه ممتعه وجميله جدا
[IMG]‏[/IMG]
[IMG]‏[/IMG]
[IMG]‏[/IMG]
وحلو المكان اللي بياخذ هدايا لاهله من تكشيطات وهالشغلات بس الاسعار مرتفعه عليك بالمكاسر الى ماتوصل سعر اللي تشوفه مناسب صراحه مكان ممتع جميل حتى للتمشيه واحنا ماشيين بالسوق كانت في بنت ببدايه العشرين تبيع حلويات واقفه عند الكشك وانا أمشي من جنبها كانت تبتسم وتاشر بيدها ومعها حلوى(( تقصد تعال وذوقها)) صراحه وقتها كنت مفلل أكل بس ماحبيت أكسر بخاطرها وجاملتها جلست أتكلم معها وتشرحلي عن بعض الحلويات ومكوناتها وهي تشرحلي أنواع الحلويات للامانه أعجبت بالبنت من أسلوبها وطريقه كلامها بس وقتها كنت محتار هل أفتح معها موضوع عن زواج قلت بنفسي الحين ((هي بتقول ناديته عشان يجرب حلوى وجاب طاري زواج )) وهي تتكلم بعد تفكير سريع وبرمجه للمخ خليت موضوعها لوقت أخر وأخذت من عندها كم نوع
[IMG]‏[/IMG]
‏
وشكرتها على أخلاقها وحسن تعاملها بعد مااخذنا كفايتنا وتعبنا من المشي بين الزنقات بعدها رحنا السياره تمشينا بالمدينه صراحه وبكل أمانه ماتوقعت فاس كذا مدينه جميله جدا وناسها أنيقين ومرتبين أعجبت فيها هالمدينه و حسينا بجوع وأخترنا مطعم وطلبنا كم طلب
[IMG]‏[/IMG]
والحمد لله شبعنا بعد ماركبنا السياره قلنا نختار أحدى الكوفهيات نطلب اتاي ونمخمخ على هالاجواء البطله
[IMG]‏[/IMG]
جلسنا وطلبنا بنص ساعه جاني اتصال من امراه عمرها بالستين طبعا عشان تاخذوا تصور كامل:-
(( تعرفت عليها على احدى المواقع الالكترونيه قبل لايطلع لي تصريح الزوج وجلست أتكلم معها بشكل عام عن مواضيع الزواج من جميع أموره حاب أستفيد منها بحكم انها امراه كبيره سن ومغربيه وتفيدني باامور أغفل عنها وكانت دايم تردد من الافضل تتزوج من السعوديه ياولدي عندنا صعب ونادر تلقى بنت محافظه (( تقصد بالمحافظه كطريقه البس ومقارنه بعاداتنا وبحكم الاختلاط والانفتاح )) وكانت تسعى معاي ودايم تتواصل معاي تتطمن علي وكانت تقولي اذا مصمم تتزوج من المغرب عليك تروح عند امام مسجد او دور تحفيظ القران هم الانسب وقالت اذا لقيت لك بنت محافطه تاكد اني بكلمك عنها ))
طبعا كان التواصل بينا تقريبا اسبوعيا ومده شهور ولما عرفت اني بالمغرب شبه يومي تسال عني وتتطمن علي الله يجزاها خير ماشفت منها الا كل خير وقدمت لي نصايح في جميع الامور كان محتوى المكالمه عن وضعي وش سويت ووين وصلت ووش صار علمتها عن اللي صار وتكلمنا عن كم شغله بعدها انتهت المحادثه.
بعد ماخلصنا من الاتاي وانبسطنا بالجلسه جاء وقت الحلاقه طبعا انصح كل واحد بيحلق ياخذ عدته معاه من الافضل مرينا على شارع فيه محلات مكان مرتب وكلاس الناس اللي فيه وأخترت حلاق وكان كبير سن قلت بس هذا الخبره واللي بيضبطني وكالعاده بالمغرب سمكر وجهي وجاب فيني العيد ويسالني هاه كيف الحلاقه وهو يبتسم على باله ضبطني قلتله اوف الحلاقه خطيره واقول في قلبي هذا وجهي اذا شفتني مره ثانيه عندك طبعا أكثر شي عانيت فيه بالمغرب الحلاقين جربت في أغلب المدن للاسف مره سيئين الحلاقه في وادي وهم في وادي بعد ماخلصت قلت للسواق على الفندق اريح شوي بعد ماريحت شوي وأخذت دش أتنشط كان بينا مكالمه انا والبنت اللي جاي اخطبهم :
(( طبعا هي متخوفه مره من رده فعل أبوها ومتوتره وانا احاول اهديها وانا بنفسي متقروش اكثر منها بس قلت اهديها وكذا وجالسين نتكلم ان الموعد قرب مابقى الا كم يوم وتكلمنا بكذا موضوع الى ماانتهينا من المكالمه طبعا مكالماتي معها اول بااول وبكل مدينه وكل كم ساعه ))
بعد مااتصلت على السواق وجاني ماعرفنا وين نروح جلسنا ندور بالسياره نستكشف فاس وندور فيها
[IMG]‏[/IMG]
(( طبعا انا عندي قاعده اول مااوصل اي مدينه اخذ اسماء جميع الاماكن السياحيه واشوف الاماكن اللي تناسبني وازورها)) وانا مدمن قهوه باليوم اقل شي اروح كوفهيات مابين 3-4 مرات قلنا نروح كوفي نشم هواء ونريح ونجلس بين الناس بعد ماطلبنا صارت مكالمه مع الاهل أعطيهم أخر الاخبار ووين وصلت واطمن عليهم ويطمنون علي ولي محادثات مع الشباب ومكالمات يعني الواحد يكون جالس يستمتع بكل شي بالاجواء والجلسه شوي يشوف الناس شوي على الجوال اخذنا كفايتنا من الجلسه وبعدها رحنا مطعم تعشينا
[IMG]‏[/IMG]
وبعد العشاء توجهنا على الفندق ونومت نومه جميله .
الجزء القادم :-
١:- مكالمه مفاجئه من رقم غريب؟!.
٢:- هل أغامر وأتكلم مع بائعه الحلويات ؟! أم لوقت أخر؟!
٣:- زياره مولاي يعقوب ؟!

في زيارتي في البحث عن الزوجه في المغرب قررت ان استفيد من ماعلمني الله فجلست ثلاثه شهور لكي ادرس اهل المغرب اجتماعيا ونفسيا و نفسيا ولن تستطيع فهمهم حتى تعيش مع الطبقه القريبه من خط السفر وهم اغلب اهل المغرب و على ذلك فسوف اعطيك نصائح على شكل عناصر و اذا اردت ان اسهب فحدد العنصر


* لن يفيدوك ائمه المساجد

* مدارس التعليم العتيق ودور تحفيظ القران ودور الحديث لن يفيدونك

* عليك بالبنت التي مستواها المعيشي على خط الفقر او اقل

* بنت الباديه او الدوار او فيلاج افضل من بنت المدينه عفه وحشمه وذرابه وسنع( ترجمها بالدارجه) وهذا في العموم

* لا تبحث الا عن واحده متعلمه ابتدائي او اميه باستثناء الاعداديه اذا كانت في دوار صغير

* انتبه من الاسر التي عندها الاستعداد ان تبيع بنتهم لاجل الحج و العمره او الطمع فيك ماديا

* كل امراه في بلاصه و لها مميزاتها

*عند وجودك للبنت اسال عنها من خلال بحثك عن المقدم او الشيخ و اعطيه 400 درهم بالكثير ويعلمك من بدايه تاريخ ازديادها حتى اللحظه الذي انت واقف امامه و اتمنى من الاخوه المغاربه و انتبه ان يستغلك و ان قال لك انني سوف ابحث لك فقم بتصريفه واتمنى من الاخوه المغاربه اعطائنا معلومات اكثر عن المقدم والشيخ(اماكن تواجدهم_من هم_ودورهم في المجتمع)

* انظر في وجه الرجل ديال حانوت و اذا ارتحت له فاتحه في الموضوع لانه اكثر واحد يعرف الناس اللي في الحومه

*سن الزواج عند بنات المغاربه من 15 الي عشرين بزاف و لكن بالنسبه لك في راي الشخصي وبحكم انه عندك ابناء فسن 23 الى 28 سوف تجد من تقبل بوضعك و خاصه ان هذا العمر يعتبر بدايه العنوسه عند البنات

* اذا كانت البنت وحيده امها فكنسل الموضوع

* اسال امها هل هي موافقه علي انت ذهب بنتها الي السعوديه وتصبر على فراقها وهنا ركز على رده فعلها

* لا تستجيب لاى عادات تخالف الشرع مثل الموسيقى والشطح وغيرها و ذلك لانك تبحث عن العفه و تحصين نفسك بما يرضى الله ولا تكن مثل الذين يعبدون الله بما يوافق هواهم

* كل نصيحه تقدم لك خذ منها ما يناسب وضعك وظروفك و الباقي اجعله بجانبك فربما تحتاجه يوما

تسلم ياغالي على النصايح ومشكور على كلامك
في بعض كلامك صار معاي وسويته ومريت بااشياء ومواقف وبذكرها لاحقا بالتقرير والمقدم صدقت فيه كانت لي تجربه معاه بس في امور أخرى والتقرير فيه مواقف كثيره لاحقا من أختلاف مستوى المعيشي للبنات واختلاف المستوى الدراسي وامور اخرى.
للعلم رحله البحث انتهت وانا اعزب لم يسبق لي الزواج.
شاكر كلامك وتواجدك
تحياتي الحاره لك

اعتذر
من كثر القراءه يبدو انني خربطت في الفهم بين موضوعك و رجل في 48 من عمره ولديه ثلاثه ابناء بن بنتين

اعتذارك مقبول والخطا وارد
اشكرك على اخلاقك العاليه
تحياتي لك

اسمحلي بعلق على بعض النقاط التي ذكرت بعد اذن اخوي محمد
اخي والله لو تجلس طول عمرك بمكان ما راح تقدر تفهم الناس . لانه كل واحد يمثل نفسه فقط وما يمثل لا مجتمعه ولا اهله ...مثلا تلاقي الاسرة فيها اخوان وكل واحد عنده شخصيته وقناعاته واسلوبه في الحياة مختلف عن باقي اخوته .


كمان غلط انه الواحد يفكر انه بنت الباديه غشيمه وسنعه ووووو ...هذا كان تفكير ولد خالتي وجابها من الباديه وطلقها بعد شهور حفظا لماء وجهها قدام عيلتها ولا هو كان بيطلقها في ثاني يوم دخلة....


بالنسبه لمقدم الحي صح كلامك بيكون عنده تاريخ العوايل لانه هذا جزء من شغله ( سالت عن مكان تواجده بيكون في مقاطعة الحي عنده مكتب او في اقرب كوفي للمقاطعه)

بالنسبه لنصيحتك انه الواحد يبحث عن وحده معها ابتدائي او أميه هذا اكبر غلط لان المراة هي عماد الاسرة هي مربية الاجيال هي التي تقضي مع الاطفال اكبر وقت هي التي تراجع معاهم دروسهم ... شلون بتساعد عيالها اذا كانت ما تعرف الالف من الياء من الزرواطه ؟؟؟

__________________
سأظل أتنفس الأمل والتفاؤل وأضيء الكون بابتسامتي رغم كل شيء

اتفق معاك ميه بالميه
بعطي مثال:-
احنا اكثر من اخ بالبيت ممكن يكون فيه شبه شكلي بس مضمونا نختلف كليا عن بعض من ناحيه التفكير والاهداف وووو هذا واحنا اخوان نختلف.
من ناحيه المقدم كلامك صحيح لقيناه بالمقاطعه اكرمه ويسوي لك المستحيل
من ناحيه مستوى التعليم وانها تكون غير متعلمه:-
من بعد نقاشات مع اكثر من شخص وصلت لهذيه النتيجه:-
١:- طبعا اغلب الاميه وكذا تكون بنسبه اكبر في القرى فعشان كذا المعظم اللي يفكر يتزوج من الخارج سواء المغرب او غيرها واذا ماكانت عنده علاقه مع بنت معينه يكون الارياف والقرى هو اختياره اول شي.
٢:- نسبه كبيره يفكر انه اذا اخذ بنت قريه انها محافظه وملتزمه ومن الفلاحه او شغلها للبيت ووو وهذا خطا واكبر خطا الكلام كله في التربيه سواء بنت قريه او مدينه.
٣:- بعض الناس يبي ياخذ بنت قريه وتكون جاهله عشان بظنه انها تكون مو متفتحه على العالم الخارجي وكذا وهذا غلط لان اخنا 2017 كل شي بالجوال بضغطه زر.
٤:- بعضهم يفكر انه اذا اخذ بنت قريه بيكون سعيد انه فقيره ومسكينه وانه ابسط شي يشوفه يقدمه لها بتشوفه هي شي كبير عزيزي ارجع اقولك غلط (( ممكن مره مرتين بعدين تتمرد)).
٥:- فيه بنات عز وخير قايمين في ازواجهم وبيوتهم وماعندهم خدمهم ولا يطلبوا اشياء ويقدروا وضع الزوج وفي بنت قريه ومو متعلمه وحاهله تطلع عيونك وطلباتها ماتوقف
للعلم كل النقاط اللي ذكرتها شفتها من حولي وتجارب حقيقيه.
تحياتي لك

*عندما تحدثت عن الناس فأنا اسعى لمعرفه ثقافه وعادات وطباع المجتمع و ليس كما فهمتي. بل الجميع يتفق بان كل شخص هو فريد من نوعه فلن تجدي شخصين متشابهان في المبادئ والقيم و طريقه استجابه واحده ولكن يوجد توافق وانسجام نسبى

* معنى بنت حشمه و سنعه و ذربه( اي امراه تحشم بالزاف و تقوم بواجباتها تجاه زوجها واولادها ودارها و ليس كما فسرتي كلامي

* وليس من الصحيح ان اجعل تجربه شخص ما فاشله على انها عامه و هي في الحقيقه خاصه لها ظروفها و حيثياتها

* مشكله التعليم في المغرب الاختلاط و ما يحدث من تبعات له من صداقه او علاقه عاطفيه. فانا اتحفظ في الاختيار من هذه البيئه و اذا كان لدي خلل في فهم الواقع فارجو من الاخوه المغاربه تبيين ذلك و حيث اننا هنا للاستفاده وليس للتشبث بالرأي

* لا استطيع الان التعليق على ان المتعلمه بكلوريا افضل من ميه ابو القارئ شويه و ذلك لنقص المعلومات لدي في هذا الموضوع و لا تنسونا يا اخوات المغرب في التعليق على هذه المسأله بالتفاصيل و بحياديه لاهميتها للرجل الخليجي

* يجب علينا يا اخوان ان نتبادل المعلومات الصحيحه فيما بيننا و ان كانت سلبيه او ضدنا فالانتماء الحقيقي هو للاسلام