سفره عائليه للمغرب الشقيق وتحتاج للمساعده

المشاركة الأصلية كتبت بواسطة عشقي اغادير

اميين ويسعدك ورحله موفقه اسمحيلي اختي افتكرتك رجال والرجال يحبون الاستكشاف والهجوله . واجازتكم محدوده ٢٣ يوم
اولا المغرب جميل للعوايل من تجربه والشعب المغربي مضياف واي مغربي ومغربيه تساليه عن اي شي سواء اثناء السفر فالطريق يرحبوا ويدلونك بكل صدق خاصه العوايل . وتبارك الله السنه هاذي جاتهم امطار خير جعلت ارضه جنه خضراء .
ثانيا بماان اجازتكم معدوده ورغبتكم الاولى الجو والطبيعه والاستجمام . فافضلكم الشمال والمدن الساحليه فالشمال بدايه من طنجه يكفي ان ملكنا سلمان الله يحفظه اختارها مصيف ومن بعد تطوان (منطقة مارتيل ) شفشاون الحسيمه الناظور والعوده بنفس الاتجاه .
ثالثا بالنسبه للمنتجعات والفنادق والشقق المفروشه متوفره في كل مدينه ممكن تحجزي عن طريق البوكينج ومادام معكم سياره وسواق تقدروا تختاروها من البوكينج وتشوفوها على الطبيعه
وتحجزوا بنفس المكان اذا اعجبكم وعادت تقييمات البوكينج صحيحه ميه بالميه وتختاري تقييم الافضل من ٧ ونص الى ٨ .
رابعا افران جميله وسويسرا الشرق بس الطريق لها عبر فاس والطريق من الشاون الى فاس طويل وصعب ووعر فالافضل تلغيها لانها مو على مسار الرحله ومدن الشمال تغني بحر وطبيعه وجمال .
وطريق البدايه من كازا لطنجه طريق سريع ويمر بمدن جميله زي العرايش مدينه هاديه وشواطي
ويوجد اخوات مغربيات لنا فالمنتدى يعرفوا رغبة النساء ممكن يفيدونك وراح يفيدوكي اول مايشوفي موضوعك .
اتمنالك رحله سعيده مع العايله .

المشاركة الأصلية كتبت بواسطة مسك القمر

الله يوفقك على رحابة صدرك اخوي .. عادي كلنا إخوان سواء بنت أو ولد ..
فعلا أهل المغرب كريم ومضياف وخلوق وهذا لمسته من خلال كثير من التقارير ربي يسعدهم شعب طيب رائع.
الأن انا احترت .. متبقي لي أسبوع هل اقضيها في فاس وماجاورها لاني حجزت كوخ في افران ثلاث ليال ثم التوجه ل كازا نهاية الرحله للتسوق وثم التوجه للمطار . متبقي لي أسبوع بعد شفشاون وقبل افران وين اقضيها ؟ صراحه جد احترت
وجميعكم فيكم الخير والبركه سواء شباب والا بنات شكرا لكم جميعا

المشاركة الأصلية كتبت بواسطة عشقي اغادير

ويوفقك يارب افران جميله وختامها مسك مادام حجزتي فافران المشكله فالطريق صعب شوي وسهل اذا مشيتوا على مهلكم وموذاك الزود مشينا الصباح ووصلنا قبل العصر المسافه حوالي ٤ ساعات بلا توقف من شفشاون لفاس . بس احنا نمشي ونريح يوجد قرى على الطريق ومقاهي ومطاعم وتغدينا فقريه صغيره قبل فاس اعتقد ٨٠واو ٧٠ كيلوا اسمها صخرة الملح على الطريق جذبنا ريحة الشواء ومحلات مصطفه معلقه الذبايح وشوي اخترنا محل وفرشنا معانا فرشات على طريقتنا الخليجيه وكان غدا لازلنا نذكره واتاي وريحنا ووكملنا طريق وصلنا فاس مع العصر والطريق كله مناظر بس خط واحد مو سريع ووصلنا فاس اخترنا السكن شقه مفروشه وكنا مرتاحين ونزلنا نتمشى ففاس . اذكر خرجنا من الشاون الساعه ٩صباح . والطريق امان بس عيبه زي ماكلتلك . منعطفات وطلوع جبل عند الخروج من الشاون بس موصعب على مهلكم ومناظر واختاروا سياره مكيفه .
والله يوفقكم

المشاركة الأصلية كتبت بواسطة مسك القمر

حلو يعني أتوكل على الله وأحجز باقي المده في فاس و ازور مكناس واللي حولها ثم أنزل لأفران مو مشكله الطريق قطعنا جبال تركيا وهضاب سويسرا عشقنا الهجوله أهم شيء النتيجه .. طيب سمعت ان فاس عباره عن ثلاث مناطق للسكن قديمه وحديثه وأتوقع جانب فرنسي أو شيء فيه فرنسي مو متذكره والله ... الله يوفقك على ردك

المشاركة الأصلية كتبت بواسطة عشقي اغادير

اميين ويوفقكم توكلي على الله والطريق موبعيد من الشاون لفاس والسكن يوجد شقق مفروشه فشارع محمد السادس شارع جميل وفيه مول برج فاس وممكن عن طريق بوكينج تختاري و تحجزي وتدفعي فمكان الاقامه . و زي ماتفضلت الاخت ميمي ومعلوماتها المفيده عن المدينه هي من اهل فاس برضه وماقصرت . والرياضات كويسه ممكن تعجبك مع اني افضل شقق مفروشه لخصوصيتها وتقدري تتفقي مع شغاله خبره اذا اقامتك ثلاثه ايام فيها تنظف وتطبخ لكم الاكلات المغربيه . وانتي اختاري اللي يناسبك . انا مااايد انك تحجزي وتدفعي مقدما عن طريق النت افضل تحجزي وتدفعي مكان الاقامه ماتعرفي الظروف وممكن تعجبكم مدينه معينه وتحبوا تجلسوا ايام اضافيه ورحله موفقه

المشاركة الأصلية كتبت بواسطة مسك القمر

الله يسعد قلبك اخوي على مساعدتك صراحه ماندمت اني كتبت لكم .. انا شفت مجمع زي الأكواخ وفيه ملاهي مائيه مناسب للعوائل الخليجيه من ناحية التعليقات عليه في البوكنج. لأن الرياضات راح نسكن فيها بشفشاون فاتوقع يكفي . شكرا لك ولو تذكرت شيء منا مناك أكتبه مانستغني