قدر شعور اللي يحبك من الناس
خلك كريم وخل للنفس قيمة
واحشم مقام اللي يحطك على الراس
تراه ما يستاهل الا الحشيمة

كان حلمي في وجود إنسان يبكي لابكيت
صار حلمي في وجود إنسان يفرح لافرحت
كنت أشوف الناس مثلي كل ما جعت وضميت
مادريت ان الأوادم ناس فوق وناس تحت

لاتحسب ان الناس بالناس تهتم
مهما بلــغ حــد الغـــلا والميانه

كم واحــد تجري غلاته مع الدم
واليــوم تجري في عروقه خيانه

فضايح الخلق حذرك لا ترددها
وتصير سهله على لسانك وترويها

لو هي حقيقه فلا لك حق تسردها
وشلون لو هي ظلايم خاب حاكيها

نـاسٍ خلقها الله .. تخلق مشاكل
ونـاسٍ خلقها .. الله تلقى لها حل

ونـاس .. بطعم الذل تشرب وتاكل
ونـاس تموت ولا رضت عيشة الذل

الناقص ﺎللي ينقل القيل وﺎلقال
نشطب على مثله مدامه خساره

قد قالوا الشعار في ماض ﺎلأمثال
من شق ستر الناس شقو ستاره!!

حلفت ما أندم علي واحد يروح
أغلى النفوس في ثرا القبر طاحت

اللي يبي يرحل محلل ومسموح
ما فيه أغلى من سنيني وراحت

الحسن ماهو في الملامح و الدلال
الحسن حسن القلب لا منه صفا

ما يغلي أسعار الصور غير الجمال
وما يغلي أقدار البشر غير الوفا

ترىٰ الكرامة سلعةٍ مالها سوق
ما يشتريها المال يا صاحب المال

لاصرت ما ذليت نفسك لمخلوق
انت الغني لو كان ما تملك ريال

صحيح عند الضيق تحتاج للـ بوح
بس الأصح تواجه الضيق بالصمت

كم كلمةٍ تنطـق بها وانـت مجـروح
واذا سلى الخـاطـر عليهـا تنـدمـت