السفرة الثالثة للمغرب والأولى لأغادير .

نويت · 2018-04-04T08:13:37+00:00

السلام عليكم ورحمة الله وبركاته إخواني وأحبائي المزاعيط , أسعد الله أوقاتكم بكل خير . هنا أشارككم بتقرير بسيط عن رحلتي من المملكة العربية السعودية إلى المملكة المغربية أتمنى أن ينال على رضاكم . وأستسمحكم عذراً إذا حصل نقص أو تقصير . أولاً : الرحلة تأجلت ثلاث مرات لأسباب خارجة عن الإرادة . وحسبي الله على من كان السبب حيث كان مقرر السفر بتاريخ 21 فبراير , وقبـل الرحلة بـ 16 يوم حصل ظرف وعرفت إنه راح يطوّل . فـ مددت الرحلة إلى تاريخ 7 مارس , والصدمة جاء 4 مارس والوضع زي ماهو . وتم التمديد إلى تاريخ 14 مارس . وكانت آخر محاولة ، إذا ما ضبط الوضع راح أكنسل , ولكن بفضل من الله تم حل الأمر بتاريخ 10 مارس .. * الرحلة من 14 مارس إلى 25 مارس * ثانياً : سير الرحلة . كما تعرفون أن مطار نجران موقف عن العمل منذ اندلاع الحرب مع ملاعين الجدف الحوثيين , حلوة اندلاع ..! المهم .... والله نعاني بشكل كبير من إيقاف المطار ولكن كل شي يهون لأجل الوطن ثم أبو فهد . الرحلة : من نجران إلى أبها سيارة ، ومن أبها إلى جدة ، ومن جدة إلى الدار البيضاء ، ومن الدار البيضاء إلى أغادير ( طيران داخلي ) .. مششوار ملعون جدف وتعب غير طبيعي . سير الرحلة كالتالي : في يوم الأربعاء تاريخ 14 مارس الساعة السادسة والنصف مساءً استأجرت سيارة من مكتب الوفاق للتأجير , إكسنت 2017 بمبلغ 110 ريال ، طلعت من عندهم على 7 وشوي المغرب ـ وعلى طول إلى مطار أبها . تم الوصول إلى مطار أبها الساعة العاشرة مساءً ، سلّمت السيارة وعلى طول قصيت البوردنق وشحنت العفش دايركت إلى كازا , انتظرت الإقلاع المقرر الساعة الثانية عشر بعد منتصف الليل . طبعاً النفسسية عال العال ومبسوط ومروّق ع الآخر ، أقلعنا من أبها ووصلنا جدة الساعة 1.40 صباحاً . فريت شوي وأخذت لي كوفي وكروسان وأطقطق بالجوال ، بعدها رحت للبوابة بعد الانتهاء من الجوازات والتفتيش . أُعلن نداء صعود الطائرة الساعة 3وشوي , طبعاً الطيارة فُل ولا كرسي فاضي تقريباً ركبت والشوق يملاني ، أقلعنا على 4.5 تقريباً ، أول ما طلعت وأقلعت الطيارة سحبتها نومة لين صحاني اللي جنبي يقول فطور . اعتذرت منه ورجعت أكمل نومي وعلمته إذا يبون يجيبون شي لا تخليهم يصحوني . وبالفعل الأخ حبيب ، ماشاء الله عليه طول الرحلة يتابع أفلام على حسب كلامه . النوم يتقطع أصحى وأنام وأريح شوي وأنام .. لين أعلن الكابتن الهبوط .. وا وا وا وناسة .. هبطنا بالسلامة الساعة 7.30 صباحاً بتوقيت الدار البيضاء ، كانت إجراءات الجوازات ميسرة رغم الزحمة ، ولا فيه بخشيش ولاهم يحزنون ، وأنا نازل من الجوازات مع السلم الكهربائي . مريت مكتب انوي طبعاً في الوجه تشوفه مباشرة ، طبعاً سفرياتي للمغرب آخذ انوي .. خذيت 10 قيقا انترنت وخمس ساعات محلية بـ 150 درهم وقبل أذكر إني أخذتها مجانية . بس هالسنة قالوا الآن فيه رسوم . المهم ما علينا ، العفش كذلك ، ما وصلت العفش إلا والشنطة جاهزة , ع طول للجمارك تأخرت يمكن نص ساعة , بعدها رحت أشوف الصرف معي ريال ومعي دولار . الريال حصلته بـ 2.33 في البنك الشعبي وفي بنك وفاء كاش . وبعدها ارتفع بآخر الأيام إلى 2.38 و 2.40 الدولار حصلته بـ 8.92 صرفت 1000 دولار . وعلى طول مشيت ، فطرت ورحت للطيران الداخلي . طبعاً فيه رحلتين حصلتها في الحجوزات من كازا إلى أغادير . فيه 10 الصباح وفيه 3 الظهر . خفت إني أحجز على 10 الصباح وما يمديني من زحمة الجوازات والعفش والجمارك . المهمم حجزت على رحلة الساعة 3 الظهر .. خلصت من المطار كامل تقريباً الساعة 9.30 ، رحت الطيران الداخلي أبي أقص البوردنق وأشحن العفش إلى أغادير . قالوا بعد ساعة ونص تعال . رحت أفطر وأجري بعض المراسلات مع أصدقاء ومثله ... والساعة 10 وشوي رجعت لهم وقلت هاه تشحنون قالوا تعال . قصيت البوردنق وشحنت العفش . فكرت شسوي لين الساعة 3 وشفت الساعة باقي وقت كثير على الرحلة ، تقريباً خمس ساعات . قلت يا ولد تلها لكازا ، طلعت وحصلت تاكسي قلت أبغى كازا . نفر فيه ونتغدى فيه والساعة 1.30 أكون في المطار تسابقوا أصحاب التاكسي وكل واحد يقول سعر . اللي يقول 600 درهم واللي أعلى واللي أنقص ، بالأخير ، اتفقت مع واحد بـ 450 درهم بالقوة وافق . بالفعل حركنا إلى كازا . دخلناها ـ قعد يمر بي بشوارع وأماكن عامة قلت وديني عيني دياب والمعاريف . أقرأ عنها ولا عمري جيتها . المهم فرينا شوي على الشاطئ إلى الساعة 12 وشوي ، تغدينا في الطازج . وبعدها ع طول للمطار . وصلنا المطار تقريباً 1.15 , دخلت المطار وخلصت إجراءات التفتيش الروتينية . توجهت لبوابة الطيران الداخلي ودخلت ، وفي انتظار رحلة أغادير . الساعة 2.30 أُعلن نداء صعود الطائرة . أكثر الطيارة خواجات , محد خليجيين غير اثنين ، وصلنا أغادير الساعة 4 . كانت مدة الرحلة قرابة الـ 45 دقيقة . هبطنا هبوط ملعون والدين . الله ياخذه والله هبّل فينا . الحمد لله عدت على خير ..! على طول كنت منسق مع صاحب تاكسي كبير . من المطار إلى فندق الخليج بـ 250 درهم اللي هي تسعيرة المطار . جيت وحصلته بانتظاري . على طول درعمت إلى الخليج ، حجزت يوم ـ بـ 1400 درهم . وصلت الفندق قرابة الساعة 5.30 العصر . ملاحظة : لي فترة طويلة أبحث عن أغادير ، من سكن ومطاعم وسهر وأماكن . ودوّنت كل شي بالملاحظات بالجوال .. حطيت أغراضي ورتبت أموري ، طلعت وخذيت تاكسي لمطعم إسماعيل ,تغديت بـ 130 درهم ـ مضغوط لحم ـ وسلطات ـ وكولا .. سريع سريع وعلى الفندق . خذيت دش سريع ، قلت الحين بنام لين 12 وشوي وبطلع لكاش أو مخيطو أو الكازار بحكم إنها قريبة من الفندق . سويت المنبه على 12.30 بالليل . يعنني يا ذاك بسهر .. حطيت راسي 7 المغرب وصحيت 8 الصباح . ^_^ صحيت ورحت أفطر . وتمشيت شوي على الشاطئ . وقعدت أفر في الأماكن اللي حولي وكلها مشي . رجعت الفندق على الساعة 11 وشوي .. ريحت شوي لين 1 ، قمت وخذيت حمام مطوّل . وسويت تشك آوت . ورحت لرويال اطلس . سكنت فيه يوم غرفة مطلة بـ 1600 درهم . لبست وطلعت لمطعم القلعة . وصلته وهو مليان طيور وشباب .. تغديت وريحت فيه شوي . وطلعت أتمشى على الشاطئ ، الجو كان خيالي وأكثر من رائع . وصلت المارينا اللي أسمع عنها . فريت فيها وفي المقاهي وعرفت بعض الأماكن . ورجعت للفندق . ومن هالوقت إلى الساعة 1 بالليل مافيه شي مهم يستاهل ذكره . الساعة 1 وشوي طلعت لمخيطو .. دخلته وطلبت عصير . طبعاً أسمع عن مخيطو وكنت أحسبه شي يستاهل . صراحة جوّه زبالة ، والطاولات اللي ورا حديد . حسيت إني في مطعم بنقالي . طلعت منه على 3 وشوي . مريت الكازار ـ خاوي ولا فيه إلا عدد قليل جداً وأكثرهم أشكال هرمه . رجعت للفندق ـ ونومة لين 12 الظهر .. ـ طبعاً عندي الساعة 1 تشك آوت .. قضيت فيه يوم ـ فندق حلو وراقي وتعامل كويس . بس والله ما ارتحت نفسياً فيه . اليوم الثاني رحت الجبل ـ ومعاصر الزيت وفريت شوي بسوق الأحد والمدينة الشعبية . رجعت على الساعة 6 ـ مريت القلعة وتغديت , وعلى طول للفندق ـ نمت لين 11 بالليل . حمام سريع وعلى الكاش ـ دخلت على البار وجوّه لا بأس به ـ عموماً أحسن من مخيطو ـ ومن قل الشباب . قال أوك رح طاولة وعلى حسب الطلب .. خذيت لي كم طلب . قعدت فيه لين روّقت وزان جوّي ، والساعة 4 مع إعلان الخروج . طلعت وحاسبته بـ 430 درهم شي زي كذا .. رجعت للفندق . ونومة لين 11 الظهر , قمت وحمام مطوّل .. ريحت شوي ودقوا علي قالوا بتمدد ولا تطلع . قلت جايكم الآن .. لميّت أغراضي ، تقولون مطلقة من مكان لمكان . بس إني حبيت أجرب أكثر من خيار .. جيتهم . سويت تشك آوت . وسلام سلام . وعلى فندق أماديل , دخلت لمكتب المؤيد الموجود في أماديل . قال السعر بـ 1390 غرفة مطلة وغرفة غير مطلة 1190 قلت أوك أشوف وأرجع لك . رحت الرسبشن . قلت بشوف الغرفة المطلة . طلع معي واحد ، شفت الغرفة والله حلوة ومناسبة جداً نظافة وكل شي مرتب . نزلت للمؤيد وحجزت غرفة مطلة بـ 1390 .. سويت تسجيل دخول الساعة 2 وشوي الظهر , حجزت مدة 4 أيام . اليوم الثالث والرابع والخامس . تفاصيلها اليومية متشابهة جداً . أحبتي أود أن أخُبركم إني كنت أزعل على اللي ما يسوي تقريره بتقرير واحد ولكن والله تعب غير طبيعي . تدقيق وتركيز وتحاول تجيب أدق المعلومة . والله أكتب لكم من الدوام . بكرة إن شاء الله زي هالوقت بنزل التقرير الثاني والأخير وفيه كل المعلومات اللي أتمنى تفيد أي عضو مستجد ويحب يزور أغادير .. كل المحبة ، وآسف على الحشو اللي ممكن تقراهـ في التقرير ..

Ahmad9090

مزعوط مبتدء

المشاركات: 34

تاريخ التسجيل: May 2018

2018-07-04, 08:46 PM

المشاركه #1

وش صار على الاماكن والمطاعم ؟

عادل اكادير

مزعوط خبير

المشاركات: 2,013

تاريخ التسجيل: Aug 2017

2018-07-05, 08:19 PM

المشاركه #2

اقتباس:

المشاركة الأصلية كتبت بواسطة Ahmad9090

وش صار على الاماكن والمطاعم ؟

اي مدينة تقصد

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

الانتقال السريع

المواضيع المتشابهه للموضوع: السفرة الثالثة للمغرب والأولى لأغادير .
الموضوع	آخر مشاركة
الجرعة الثالثة	2022-02-11 08:32 AM
تكاليف السفرة للمغرب أول مره أروح	2017-08-25 03:01 PM
شكلي بكنسل السفرة للمغرب!!	2017-01-30 12:12 PM
العودة إلى الساعة القانونية ابتداء من الثالثة صباحا غدا الاحد للمغرب	2014-10-26 11:08 AM
دبي: المحاولة الثالثة	2013-09-10 04:04 AM

الساعة الآن 11:03 PM

عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب

السفرة الثالثة للمغرب والأولى لأغادير .

روابط سريعه