الحجز عن طريق Airbnb والسماسرة !!!

صباح الخير عليكم يا حلوين

أنا حبيت اتكلم عن الحجز عن طريق موقع Airbnb ونصائح للي بيحجز عن طريقه ترا الموقع ممتاز واسعاره اقل بالضعف والضعفين عن طريق السماسرة وكل شي موجود فيه من شقق وفلل ومنتجعات وشاليهات ومزارع وكل شي لاكن بعلمك عن طريقة هي الأفضل وخاصة شف قوانين المؤجر ويفضل ان تستاجر اللي فيها وصول ذاتي يعني لا يقابلك ولا تشوفه وبعضها ما فيها عساس ومطاريس لاكن شف موقع العمارة والمداخل والمخارج ويفضل اللي فيها تسجيل الوصول عن طريق صندوق الامانات او برقم سري بكذا تريح دماغك من العساس والسمسار وترا على فكرة اغلب السماسرة مسجل فيه أنا كذا شقة استاجرتها عن طريق معرفة او عن طريق عساس حاطينها في الموقع هو في الأخير يبي يأجر ويستفيد ماهو مخليها فاضية لاكن إذا جيت عن طريق السماسر إذا سعرها عنده ب 1000 بتاخذها عن طريق الموقع ب 500 او 600 مثلا واذا سعرها عند السمسار ب 2000 بتحصلها في الموقع ب 1000 و 1200 وعلى فكرة بعضها إذا صلحت لك وسكنت فيها عن طريق الموقع مثلا ب 800 تراك بتاخذها عن طريق المالك ب 600 لان الموقع يأخذ عمولة على المالك وجرب يومين منت خاسر شي بس طبق الطريقة اللي قلت لكم اما السماسرة يستغلون الواحد وهذا الغالبية مع احترامي لهم الا ان بعضهم كويس لاكن قلة وكلامي هذا موجه للوحداني خاصة او اثنين بشرط انهم ماهم راعين ازعاج ويراعون الناس اما اللي راعي ازعاج وافلام ما تصلح له اما الانسان اللي يعرف وشلون يوزن اموره ويحترم الجيران فهذا اموره طيبه .

وبالنسبة للي راعي أفلام سوا مستاجر في فندق والا شقة والا عن طريق سمسار والا غيره ماهو سالم من المشاكل ام سالفة الامن والامان انت اللي تصنع لنفسك الأمان والا اسطوانة السماسرة اللي يلعبون على وتر الامن والامان ما عندهم سالفة تحصله يأجر عن طريق المواقع وغيره باسعار رخيصة لأنه لازم يواكب الاسعار المعروضة ويبي يأجر ماهو مخليها فاضية اما اذا شافك خليجي بدا يتفلسف عليك والسعر دبل الدبل .

وبالنسبة للسكن عن طريق الموقع فيه حاجات فخمة واثاث بعضها ما توصل له حتى الفنادق الخمس نجوم واذا انت انسان خايف تتوهق في الموقع وما يقبل يدخل لك احد جرب اول يومين وبعدها در على العماير والأحياء الكويسة ترا اغلب العساسين عندهم علم وتأخذ شي على نظرك وحسب الاتفاق انت والمالك و اكرم العساس على خدمته لك اما السماسرة اذا ما تعرفه شخصيا وسبق وتعاملت معه واسعاره كويسة والا اسحب عليه الديرة ماهي واقفة على احد اول يوم ريح وعين خير ورح اشتر اللي تحتاجه وتمش ووسع صدرك ودور على راحتك وبتلقى اللي يرضيك موفقين خير .

هلا بك يالغالي كلامك فيه من الصحة الشي الكثير لاكن مثل ما قلت لك اقر شروط المالك زين وطبق الطريقة اللي قلت زين والفكرة تصلح للوحداني اكثر من الشلة وانا سبق وان حجزت عن طريقة ومشت اموري تمام وعلى طارئ السماسرة اتحداهم يجيبون نفس فخامة اللي في الموقع الا باسعار مضاعفة ودبل الدبل اما الغالبية والله شققهم ما تصلح للسكن الادمي ومستهلكة ومعروفة للجميع وسمعتها رايحة وطي وبالنسبة للي خايف انه يتجحفل اسكن اول يوم في اي فندق ودر على العماير ماني جابر احد على الموقع لاكن المقصد الابتعاد عن السماسرة واستغلالهم وفلسفتهم موفق خير

أنا ادري اني طولت عليك بالكلام لاكن بعطيك مثال بسيط مرة من المرات كنت انا واحد من الشباب ندور على شقة ولقينا شقة حلوة عن طريق سمسار هو يعرفة وشفنا الشقة وأعجبتنا الصراحة لاكن شطح علينا في السعر وقال لنا ب 1100 ولا رضى ينقص المهم قلت لخويي أتركه عنك وخلنا نشوف مكان ثاني المهم سكنا في مكان ثاني أرخص ورفيقي خاطره في الشقة المهم دخلت على airbnb الا وهاذي الشقة ونحجزها عن طريق الموقع ب 700 درهم وطلع السمسار ما عنده سالفة مغير اتصالات من واحد الى واحد واخرتها زبطت معنا ووالله لو يدري ان يموت من القهر تحياتي لك .

هلا بك يالغالي كلامك صحيح واللي يبي الاضمن الشي اللي على النظر وهذا اللي افضل بالنسبة لي وانا اشوف افضل شي ان الواحد يدرو اول يوم والا ثاني يوم على العماير ويكلم العساسين ومن راسك لراس المالك هو الأفضل والشي البين هو الأفضل خاصة للي عنده وقت اما اللي جاي طياري اسبوع او عشر ايام وما عنده معرفة الله يعينه على الاستغلال والا فندق اما اللي رايح مدة طويلة يقدر يدبر اموره .

اما سالفة انه يطفي علي الكهرب والا يقطع الماء متعمد هذا له تفاهم ثاني معنه ما قد صار معي هالموقف الا انه سبق وانقطع عني الماء في كذا عمارة على السكان كلهم خاصة اخر الليل لصيانة او غيره اما ان احد يقفله علي متعمد ولا حل الموضوع لي تصرف معه ما يعجبه أنا مسافر أوسع صدري والا جاي واحد يستهبل علي ويستغلني والحلول كثيرة لو وصلت اني أتلف اي شي في الشقة وان ما لقيت شي والله لو اشتري بخاخ واكتب ذكرياتي على الجدارن مع ان هذا ماهو طبعي لاكن أن واحد يهني والا ينقص من كرامتي بدري عليه يقول من بغنا بالطيب فيبشر باللي أطيب منه ومن بغنا بالردى نقوله عند خشمه .

والدنيا ما تخلو من المواقف وأنا من النوع اللي ما أدفع بخاشيش لو يطيرون الا مخطي او جايب العيد او واحد مقدم لي خدمة مثلا عساس جايب لي اغراض من البقالة او جايب لي دبة غاز او مساعدني في شيل الاغراض ام واحد في الطالع والنازل يبي فلوس مع نفسه انا ماني فاتح جمعية خيرية ومن المواقف أنا مرة مستأجر عند واحد الا والعساس ينشب لي شافني داخل طالع وما اعطيه شي وقال انت مسوي ازعاج والجيران يشتكون ومن الكلام الفاضي وبعد النقاش معه مع آني ما سويت شي وما لقى مدخل علي وصار يهددني ويخوفني بالبوليس وقلت له اعلى ما في خيلك اركبه ولا يردك الا الكوميسريه واللي عنده شكوى يوجه لهم وماهو شغلك اصلا اللي عنده شي يروح يشتكي وأنا اخاويه لمركز الشرطة واصلا حتى لو فيه شي في العمارة ترا العساس والسكان مالهم حق يتكلمون معك المسئول عن العمارة هو السانديك واتحدا أي واحد يقدر يداهمك الا بأمر قضائي من نائب الملك ولا يقدرون يدخلون عليك اصلا الا بعد الساعة 8 الصبح والمدهمات ما تجي الا بأمر قضائي والا يكون في حملة من الرباط هم المخولين ام غيره خله يضرب براسه في اقرب عاير أنا راعي ديرة واعرف انظمتهم زين ولاهو قصور في احد وهذا احد المواقف .

وبالنسبة للبخاشيش أنا والله من الناس اللي ادور وافر في كل مكان واذا شفت فعلا احد محتاج عطيته بما تجود به نفسي اما واحد يفرض علي شي والا يوقف على رأسي في اي محل اسحب عليه ولا يهمني .