زيارتي للمغرب ومراكش والتي بسببها عشقت المغرب

هناك تقاطع بين الجنون والعبقريه ... كل العباقرة تكون معظم تصرفاتهم توحي بالجنون
ولكنه جنون الابداع
حجزت مقعد في الصفوف الاول بين بيضاوية وسمو نرقب نهاية جنونك

__________________
قلت اسقني من ذبل مرهفاتي عسى طيور القلب تركد عن الحوم

هههههه لهلا يخطيك .. وعلينا وعليك ان شاء الله ... وراك وراك احنا

__________________
كلآم الناس بالنسبة لي ،، مكآلمة لم يتم الرد عليهآ ..!!!

فعلا .. تقرير يستحق المتابعه ... شد انتباهنا معه ...

هلا بيك معانا بالصف هههه

__________________
كلآم الناس بالنسبة لي ،، مكآلمة لم يتم الرد عليهآ ..!!!

تقرير رووعة
بانتظار التكملة

ما أتفق معك مشكلتنى كخليجيين عامة وسعودين خاصة الواحد برا مايبي وجع رأس لو يطلب يرفض مايقدرون ولو تطلب سفارتك يفكونك في سالفة لشخصين أتهموهم وأخذوهم المخفر سالفة طويلة قريتها في إحدئ المنتديات ودفعوا علشان زي ماقلتي الموقف مو لهم لمن فكوهم أحد رجال الشرطة سبهم واحد منهم أنفجر غضب وقهر ودق عالسفارة السعودية ووصلت للمديرية حق المخفر في النهاية أخذوا المبلغ ويحلف الشخص اللي يقول القصة إن الشرطي جلس يبكي ويتوسل لان عقوبتها فصل على ما اظن

اللي بوصله لك حنا مانبي دق على سفارة وماني عارف وهذا اللي خلاهم يتمادون لو حنا مثل الأوروبين تقوله كيف الحال دق عالسفارة ههههههههه

السلام عليكم ورحمة الله وبركاتة
راح أعيد أخر جزء ومنها أكمل لأنه مثل ماقلت أرسل ناقص وأنا أفضل أنزل جزء تكون الأحداث مع بداية يوم جديد وأختمه بنهاية يوم ( تحياتي)

الأحد ٦/١٦ ميلادي

صحيت الساعة ٩ وجلست مع صديقتي العزيزه نتبادل أطراف الحديث لأني أستمتع بكل لحظة معها وبحكيها وأحب خجلها وتعويض اللحظات التي كنت أشتاق لها في بلدي
الساعة10:30 كل شخص راح يبدل وطلعنا نفطر في المحلبه ديالي بعدها رحنا المناره بس علشانه حر والظهر ما طولنا وطلعنا
أخذنا طاكسي قاصدين قصر البديع مسافة أقل من 10 دقائق (قصر البديع تاريخي وأثري بناه السلطان السعدي بعد إنتصاره في معركة ضد البرتغاليين ) المنطقة اللي فيها قصر البديع وقصر الباهية الذي بجانبه تعج بالسائحين الأوربيين تحس إنك في بطولة اليورو ونسبة قليله من أصحاب العيون الضيقه( شرق آسيا ) طبعا أنا أنبسط بها الشئ ولا زود على ذلك بما إن الجو حار شوي السائحين يطربك وتشوف شئ على قولة( الشاعر خلف بن هذال / شئ يخلي جبين الحر ينداله )
مالها دخل بس طرت على بالي هناك محلات بالمنطقة كلن وصنعته هذا يبيع تحف والثاني جلابيات والآخر أقمشة حبيت المكان وصلنا قصر البديع قالوا مقفل فيه صيانة تخلص اليوم الثاني طلعنا رحنا قصر الباهية كلها جنب بعض حول ساحة وجامع الفنا قصر حلو رغم مضي أكثر من 150 عام تشوف الزخرفه والنقوش ويقولون إن مافيه سقف يشبه الآخر ( أنصحكم بالقراءة عنه ) هذا القصر أتوقع وقت بنائه كان يصنف من وحي الخيال للأمانة يستحق الزيارة أظهرت مهاراتي في التصوير لين خلصت البطارية كالعادة بس المره ذي مع الشاحن

طلعنا خذينا لفة على المنطقة والمحلات وكالعادة صديقتي العزيزه تعبت إذا صارت تمشي وراي يعني نفذت لياقتها أوقات العسكرية وتأثير دوراتها العنيفه تغلبني وأقولها وااصلي مشي لكن إذا شفت التعب أختلط مع الجمال أمسكت بيدها ونكمل المشي أو أعطيها راحة ، لحظات والجوع أخذ أسلوب الغزو
شفنا بجوار قصر البديع مباشرة مطعم ومقهئ تصعد بالدرج تحصله مكشوف ( يعني بالسطوح ) ومطل على الساحات والمحلات طبعاً الغداء لازم الطاجين أساسي وكالعادة الأكل في هالبلد لذيذ بعد الغداء شوي حلى وقهوة .

بعدها رجعنا الفندق فترة راحة أبو ساعة ونص بعد الهجوله لو ما نريح ممكن صديقتي العزيزة تاخذ أغراضها وترجع كازا هههههه ذبحتها بالمشي والهجوله، أذان العصر كإعلان عن نهاية فترة الراحة ( على فكرة يأذن العصر حول الساعة 5 والعشاء الساعة 10 أغلب المحلات والدكاكين اللي بشارع الفندق اذا أذن العشاء قفل ) المهم صليت وطلعنا والوجهه ساحة الفنا الشهيرة اللي أي تقرير تلفزيوني عن المغرب لازم تنعرض ، خذينا طاكسي وهوبا ساحة الفنا وقف الطاكسي وقال وصلتم نزلنى وعالطول أسحب الكاميرا من على كتفي تقول إني بأقتحم مشينا متجهين لساحة والزحمه وااضحه من بعيد الساحة وكلن يترزق الله بطريقته الخاصة اللي معه ثعابين و شوي يدخل فيك واحد ويغني مستخدم الطبله واشوف عالم متجمعين وكل واحد وسنارته أستغربت حدااق هنا هههههههه أنظميت لأعرف وش عندهم لقيت شخص حاط مجموعة علب عصير مختلفة الأحجام ويعطيك سناره بس تدفع مبلغ بسيط واللي تصيده خذه لك بس أفقشني اذا قدرت
وتشوف اللي يجذب الناس بحركات الخفه والمكان فعلاً مزدحم ومابين التنقل والإندماج في المشاهدة ألتفت لصديقتي العزيزة ولم أجدها يمين يسار مافيه وأعطيك لفه كاملة مافيه أحد الوضع بداية إرتباك مع دقات القلب اللي حطمت أرقام قياسية وزود على ذلك إنها ما أخذت جوالها تركته في الفندق
قررت أمشي عكس إتجاهي مسافة قليله وأشاهدها واقفه وتأخذ ثلاث لفات في ثانية المسكينه ولا أنتبهتلي إلا لمن قربت منها حسيت بعودة الروح لها وكلن يعاتب الآخر
أمسكت بيدها وكملنا المشي ولكن أخذنا جهة المقاهي التي على جنبات الساحة البعض منها في الأعلى والذي يكون عامر لأنه يطل على الساحة كاملة والبعض لتصوير وأنت واقف تحت مع الغروب تشاهد فلاشات اللي تسوي منظر ملفت ثم أتجهنا أتجهنا للجهة المقابلة وهي دكاكين ومحلات الجلابيات وأكسسوارات وهدايا وألعاب وخذيت شوي أغراض لي وصديقتي العزيزه ( من حضر القسمه فاليقتسم )واللي قررت الرجوع له قبل السفر لأخذ الهدايا أذن المغرب وحل الظلام .

المهم فريت الساحة زنقه زنقه شبر شبر زاوية زاوية لدرجة وحنا بين الأزقه والظلام صرنا ماندري وين متجهين شوي الا أشوف ساحة صغيرة جداً ترابيه والمحلات تحيط بها المكان موحش نوع ما طلعت محلات لبيع الإرقيلات والمعسل تذكرت أخوياني وعشقهم لها قلت بصور وأرسلهم لأن أشكالها والزخارف أعجبتني وأنا مو حق معسل ، وزي ماتوقعت نشبولي نبي منها
وعدنا لساحة قاصدين الأكشاك ( جمع كشك ) الذي يتفنون في الأكل المغربي وبما إن صديقتي العزيزه من عشاق الحريره وكانت تقولي لازم تذوقها وكانت هذه هي الفرصة
بعدها صليت المغرب ورجعنا الفندق حطينا الأغراض ورحنا نتعشئ وقلنا مايحتاج طاكسي منها يكون العزف المنفرد والأستمتاع بالجو اللي يكون رايق ليلاً قالت شو رأيك نروح مقهئ ونستمتع بالطرب وأغاني ونغير جو قلت مافيه مشكلة بعد العشاء رجعنا وتكشخنا طبعاً ماندري وين نروح مانعرف المقاهي الحلوه من اللي عامره او ماينصح فيها وزي كذا لكن عم قوقل في الخدمة بحثت طلعت لي كذا مقهئ جاء الأختيار عالديوان لكثرة اللي يمدحونه

أخذنا طاكسي وعالديوان أفتكرنا إنه قريب من كيليز طلع بعيد عن وسط المدينة والتكاسي مافيه ( يجون يوقفون عند المقاهئ والمراقص يدورن زبائن ) وصلنا الساعة ١٢:٢٠ وكان فيه تردد أنا والمزمزيه من ناحية ما نحصل طاكسي والثانية لا يكون الوضع لا تنزل شراب لأن في حياتي مادخلت مكان زي كذا ولا أدري وش الوضع ، كلمنا صاحب الطاكسي ترجع لنا قال راح تتأخرون قلنا لا ساعتين قال أوكي وأخذنا رقمه باقي سالفة المشروب قلت أستفسر نزلت لقيت أحد العاملين في الديوان قال ماتشرب قلت لا قال تفضل في الجهة ذي أشر عاليمين قلت أوكي رجعت وأخذت المزمزيه ودخلنا أغلب الموجودين من الخليج وهذا السبب إنه عامر بالطيور جوهم حلو ومطرب وأغاني وروقان وأنا بدأ يطري على بالي موعد السفر ويعكر مزاجي ولكن أحاول أندمج بالجو والطيور من كل الأشكال والأجسام والأحجام حسب طلبك تحتار وين تناظر تعمدت أخذ طاولة بعيد عن الطيور علشان عارف بيصير فيه نظرات وإبتسامة ( إحترام لشعور صديقتي العزيزة )
بعد الساعة ١ بدأ المقهئ يمتلئ والطيور على أشكالها تقع ( أتوقع فاهمين )
ما طولنا الساعة ١:٥٠ طلعنا وعالفندق ومزاجي لا أعلم ملخبط او مبسوط
وصلنا ونووم

الأثنين ٦/١٧ ميلادي

قمنا الساعة ٩ و الساعة ١٠ طلعنا من الفندق والجدول يشير إلى حدائق ماجوريل كانت قريبه ، وهذه ميزة الفندق موقعه ممتاز كل شئ حولك دخلنا الحديقة اللفه الأولى للإستكشاف والثانية لتصوير مكان زوين وتصميمها رائع فيها نباتات من كل القارات الخمس وكالعادة كلهم أجانب أنا وصديقتي فقط عرب وانا الوحيد ( أسمر ) علشان كذا سويت عليهم كوميدي ستاند اب ،، ما طولنا وطلعنا الساعة ١١:٣٠ فطرنا في ( محلبة الاسرة ) المحلبه ديالي ولازم عالفطور ( مسمن ) اللي تسويه حرمه كبيره بالسن وهي توقف في زاوية المحلبه ومعها الفرن المتحرك وتشتغل ودخل المسمن لها ، ياحليله مبتسمه لناس والحياة رغم ظروفها التي أجبرتها تقف بالساعات لتوفر لقمة العيش ( الله يرزقها دنيا وآخره )
المهم بما إني كل صبح وأنا مشقر عليهم صارت تتبسم لنا أكثر بصراحة تنحب قامت صديقتي العزيزة تغسل هي ناظرت وهي طالعه وقفتها وتكلمت معاها سألتها شنو تقول
قالت توصيني عليك وتقول آكلي زوجك وأنتبهي عليه السمر حنونين ناظرت فيها وأبتسمت وجاء على بالي ( العنصريه اللي فرقت بين شعوب ومن أكثرها هذا أسمر وهذا أبيض ) المهم بعد الفطور قمت أبي أغسل تكلمت معي مغربي بحت مافهمت شئ سكت مارديت عليها هي عرفت ألتفت لصديقتي تقولها هو من ليبيا هههههههه قالت لا سعودي ردة فعلها شهقت وتضحك وسلمت علي .

£مداخلة خارج التقرير ( تصدقون عاد سالفة الجنسيه يبيلها تقرير كثير مواقف حصلت لي سواء في المغرب مرواً بإندونيسيا والخليج آخرتها بمطار الملك خالد ، عرفت ليش أقاربي يقولون لي تشبه المصارع راندي أورتن )

& نرجع لتقريرنا &
أخذنا طاكسي والمقصد أوريكا ( مانسيتها لازم أوصل القمة وأوثق ) وركبنا الى مواقف التاكسي حق أوريكا ومشينا وسالفة الدرك برأسي بس المره ذي صدقوني السالفة توصل لسفارة المهم تحركنا وطق السماعة ياحبيبي وعلى أنغام فناني الأول أبو نوره أحاول ألتقط ما فاتني في الرحلة الأولى ولم أتفوه بكلمة وأنتظر نقطة الدرك ولكن لم يطلبوا منا الوقوف حتى عند عودتنا تأكدت إن السالفه الأولى مدبرة
--

وصلنا جلسنا وأخذنا سلة فواكه وأستغليت جلوسنا للإستمتاع والنظر لصديقتي العزيزة وأنا كلي شوق لها وأنا معاها في جعلتني أعشق المغرب فوق جمال البلد بطيبتها وحرصها وخوفهت علي ( والله لم أبالغ لكن فعلاً اغرقتني بحسن تعامله نحن لم نعرف بعض من ليله او أسبوع نعرف بعض حول السنة وأستمرت بعد العودة ) قررنا الغداء بعد النزول من الأعلى مانبي نطب بالعيشه وحنا ورانا طريق صعب المكان ما فيه زحمة مثل أول مره لأنه في نص الأسبوع لكن هالمره واجهت شباب من الخليج
--
وبما إن الوقت بدري نطلع عالرايق وفي مكان نوقف طبعاً وانت تمشي تسمع خرير الماء من كل مكان جذبني شخص يبيع عصائر ماعنده ثلاجة أصلاً ما يحتاج مكانة قريب من شلال صغير يضعها هناك لها منظر رائع وتجئ تحصلها بااارده من الشلال وصلنا عند آخر عقبه وتطلعك لشلال الكبير نفس عميق وأخذ بيد صديقتي ونطلع كل ما أقتربنا تسمع خرير الماء قوي وصلنا القمة والشلال الكبير عالطول الكاميرا وأوثق وجلسنا نستمع بالمنظر على أنغام الصوت القوي وبداخلي الحزن الذي أستعجل بالقدوم وأخذ مكان بداخلي وصارت ملامحه على وجهي فأنا هنا أعيش لحظات لم أعيشها بحياتي ألتفت لصديقتي علشان أفتح موضوع وأنسئ الحزن اذ بها تسبح في عالم التفكير سألتها قالت والو

الساعة راح توصل ٦ نزلنى متجهين لطاكسي مافيه وقت للغداء وحنا نمشي قالت أفكر في رحلتلك بتخليني وتروح كلامها فجر الحزن بداخلي حاولت أن أظهر إبتسامة وقلت : حتى لو سافرت راح نتواصل ماراح يتغير شئ وقطعت الموضوع بالمشي وركبنا الطاكسي على مراكش الساعة ٦:١٥ الطريق كله تفكير
وصلنا لساحة الفنا الساعة ٧:٢٢ رحنا ( قصر البديع ) أحد أهدافي لزيارة لقيناه يقفل الساعة ٤ رحنا نتغدئ في ( مقهى قصر البديع ) خلصنا مع أذان المغرب٨:٤٩
كان مخططين نسير ل مهرجان علي بن فلاح لكن مايمدي نروح الفندق ونطلع مع الباص
صليت المغربوذهبت لأشتري هدايا للأهل والزقرت حقين الإرقيلات مانسيتهم خذيت لهم وأنا أقول الله يستر لا يقولون ممنوع أذان العشاء ورجعنا الفندق حطيت الأغراض
وعالطول رحنا نصرف فلوس ورحنا محطة القطار مشي طبعاً علشان نعرف مواعيد الرحلات لكازا وانا ودي لو الزمن يوقف لحظه قضيت المشوار ورجعنا الفندق
--
الجو ماينفع جلسه لان الكل بداخله حزن ومانبي نقلبها دراما حزينه شفنا الوضع كذا مالها إلا نطلع علشان نغير نمط الحزن الساعة ١:٣٠ رحنا ماكدونالدزنتعشى أكتشفت إن ماكدونالدز اللي بكليز موقع لصيد هناك الطيور وااجد وتخيلوا لقيت من ههههههههه
الشيبان اللي بالطائرة صاحب الإتكيلا وخويه أول ماشفتهم ضحكت خلصنا ومشينا اتفقنا نروح مكان عكس البارح يعني الليله مانبي عرب نبي أجانب نشوف جوهم طبعاً مانعرف ولا عندي نت أسوي بحث قررنا على ذوق صاحب الطاكسي
--
وأحنا ماشين التكاسي واقفه قدام المطعم حنا وقفنا عالشارع ونأشر وقف طاكسي جينا بنركب مدري من وين طلعوا عالم ويصارخون ههههههه طبعاً مدري شسالفه واللي يروح من جهة السواق طلعوا حقين التكاسي تهاشوا معه شلون تأخذهم من هنا وحنا واقفين هو عارف الشغله راح قالنالهم السعر المتعارف عليه لا تقولي انا واقف هنا من زمان وماني عارف قال لا ماعليه اللي عنده الدور راح يقرب الطاكسي واحد منهم كان جنبي عمره أتوقع في نهاية العقد الثالث قال :
you speak ench
قلت : no وأنا طبعاً مابيه يعرف إني خليجي
وأفكر باللغة صعبه وراكبه علي إني اتحدث فيها
قال : you speak Portuguese
قلت : No يقلب في ملامح وجهه دليل عالإستغراب وأنا في نفسي أقول يخرب بيته ذا محجرلي
قال: you speak English قالها وهو يبتسم
وأنا والله فيني ضحكة بس مسوي ثقل
قلت : No أنفجر ضحك قال الأخ عربي
هو ضحك وأنا فكيتها ضحك ههههههههه
قال: خليجي/ قلت : نعم وهو يتبسم يرحب فيني ليش ماقلت من أول وأنتم أهلنا شكرته وجاء الطاكسي وركبنا علمناه بشنو نبي قال بوديكم كلوب سلفر مشهور بالمغرب مكانه شارع فرنسا وصلنا المكان واضح انه شغل على مستوى عالي فيه أعلام لبعض الدول كلها أوربيه
الدخول لشخص ٢٠٠درهم غيرنا جو وحاولنا نستمتع بأخر ليله في مراكش ونؤجل الحزن طلعنا أخذنا تكسي ب ٥٠ درهم ورجعنا الفندق
جلسنا مع بعض شوي بعدها محاولة نووم

باقي الجزء الأخير وداع مراكش وفراق المغرب البلاد الساحرة

انت أروع يامزعوط من ذوقك

هههههه كلجت في الكلام العتب عالنوم عاد حاولي تفهمين

الجزء الأخيررر متعب نفسيا بس عساك ماتعلقت هههه لااوصيك كل فطير وطير